Gazetari Bozhinovski thotë se Ali Ahmeti organizoi eliminimin e vëllezërve Gërvalla [dokument]

Fakte që nuk përkojnë me realitetin në mërgatën shqiptare në Gjermani

Një grup intelektualësh nga Shtutgarti reagojnë ndaj Ibrahim Kelmendit

Bota Sot 09.03.2012

Në intervistën dhënë televizionit “Klan Kosova”, përkatësisht kryeredaktorit të saj z. Baton Haxhiut, Ibrahim Kelmendi, ish anëtar i kryesisë së LPK-së, Dega jashtë vendit, pranë shpalimit që i bëri punës së kësaj lëvizjeje, ai, me emër dhe mbiemër akuzoi Riza Salihun si vrasës të heronjve Jusuf e Bardhosh Gërvallës dhe Kadri Zekës. Foli edhe për grevën e urisë që e ka organizuar në Bonn dhe Shtutgart kundër presidentit Sali Berisha dhe Ibrahim Rugova. Nuk e tha se para përfundimit të grevës ata hynë në zyre të Qeverisë së Republikës së Kosovës në exil me kryeministër Bujar Bukoshin dhe Isa Mustafën ministër i financave, ku gjetën strehimin.

Akuza bizare kundër Rugovës e LDK-së

Andaj, me të drejtë është pritur që ndonjëri nga anëtarët e kryesisë së LDK-së të reagonte ndaj kësaj interviste, ku I. K. zbrazi për të njëqindtën herë me radhë, akuzat e tij bizare kundër presidentit Rugova dhe rolit të LDK-së në luftën e çlirimit dhe pavarësimit të Kosovës, duke thënë se ajo (LDK-ja) “ishte formuar nga strukturat e pushtetit serb me qëllim për ta shuar rezistencën e popullit shqiptar, alias të LPK-së ndaj robërisë dhe pushtimit serb të Kosovës..”!?

Natyrisht, se rreth kësaj akuze të rëndë nuk ia vlen të merremi më shumë, sepse, përveç se është një trillim i kulluar nga imagjinata e tërbuar enveriste-staliniste e I. Kelmendit kundër LDK-së dhe liderit të saj historik, dr. Ibrahim Rugova, kjo në esencë shpalos mentalitetin e kriminalizuar si dhe urrejtjen patologjike të tij ndaj një Lëvizjeje gjithë popullore, siç është quajtur nga vetë populli, e formuar në fillim vitet e 90-ta e cila mori emrin LDK, anëtarësinë e të cilës e përbënte shumica e popullit shqiptar të Kosovës. Pra, është kjo një akuzë e kahershme e I. K. e cila nuk qëndron në asnjë variant të mundshëm, as atë politik, as ushtarak dhe as diplomatik, kur dihet botërisht se roli i LDK-së dhe liderit të saj karizmatik është pranuar dhe shpërblyer disa herë nga nivelet më të larta ndërkombëtare.

Nëse Ibrahim Kelmendi dhe bashkëpunëtorët e tij e kërkonin dorëheqjen e Rugovës përmes dhunës dhe fyerjeve që i bënin dje, por edhe sot në media dhe libra të famshme, shtrohet pyetja; pse kryetari aktual i LDK-së nuk ka reaguar ende ndaj akuzës së I. K. drejtuar LDK-së, apo ndoshta e ka zgjedhur heshtjen për faktin sepse ai në atë kohë ishte rreshtuar krah njerëzve që kërkonin kokën e Dr. I. Rugovës. Ndërsa qëkur ka hyrë në LDK vazhdimisht thirret në figurën e Ibrahim Rugovës dhe filozofinë e tij politike.

Me këtë rast do mund të shtroheshin edhe shumë pyetje tjera për diskutim rreth intervistës së Ibrahim Kelmendit, por edhe rreth lojërave dhe disa lojtarëve politik në ato vite (1993-99), të cilët luanin me ndjenjat patriotike të mijëra bashkatdhetarëve tanë, madje shpeshherë të fshehur pas patriotizmave të rremë. Kësaj radhe do mjaftohemi vetëm me kaq, meqenëse reagimi ynë ka të bëjë më shumë me shtrembërimin e ngjarjeve në mërgatën shqiptare në Gjermani dhe disa vende tjera të Evropës, pikërisht nga Ibrahim Kelmendi me bashkëmendimtarët e tij, të cilët angazhimin e tyre “patriotik” e bënin gjithnjë mbi urrejtjet e pa kuptimta ndaj Ibrahim Rugovës dhe LDK-së, duke shkaktuar ndasi dhe përçarje brendapërbrenda Lëvizjes shqiptare për çlirim dhe pavarësi. Kjo, me vetë faktin se Ibrahim Kelmendi me një grup të vogël në LPK-së ka qenë pakicë politike si brenda ashtu dhe jashtë vendit, andaj përpjekjet për ta imponuar një histori të rrejshme nga një grup minor, ndodhë vetëm në vendet e dala përmes revolucioneve. Dhe, jemi të sigurt se në Kosovë nuk do të ketë vend një regjim i tillë, sepse shumica e shqiptarëve kanë qenë dhe janë me LDK-në si alternativa më e mirë demokratike. Madje, pakica politike askund në botë nuk e ka dhe as nuk do ta ketë të drejtën absolute që të shkruajë historinë e një populli sipas këndvështrimit të saj ideologjik, egocentrik dhe të njëanshëm, bile plotë me shtrembërime të fakteve, ngjarjeve, personazheve dhe rrethanave që i kanë paraprirë luftës sonë çlirimtare, por edhe të ngjarjeve që kanë ndodhur pas çlirimit të Kosovës e deri më sot.

Shpifjet janë produkt i LPK-së

Duke mos u zgjatur shumë në këtë reagim, publikisht shprehim habinë tonë; se deri kur do lejohen njerëz të tillë me shpif dhe akuzuar një lider historik dhe një parti nacionale, siç ishte LDK-ja, e cila ndërtoi dhe ngriti bazat e shtetit të Kosovës në rrethana shumë të vështira të okupimit. Po ashtu, për ne është i pa pranuar fakti se si shpifjet dhe trillimet gjatë kësaj interviste I. K. i paraqiti para opinionit si të arritura politike dhe kombëtare si “produkt” vetëm i LPK-së, duke mohuar angazhimet madhore që ka bërë LDK-ja bashkë me partneret e saja politike në Kosovë dhe diasporë për zgjidhjen e kauzës tonë kombëtare si dhe për lirinë të cilën sot e gëzon populli shqiptar. Prandaj kërkohet nga akterët e asaj kohe që kanë qenë të angazhuar në LDK brenda dhe jashtë Kosovës që t’i publikojnë faktet e asaj kohe, në mënyrë që t’u ndërpritet rruga falsifikatorëve të historisë siç është I. Kelmendi.

Një grup intelektualësh nga Shtutgarti me rrethinë

Shtutgart, me 07. 03. 2012