Gazetari Bozhinovski thotë se Ali Ahmeti organizoi eliminimin e vëllezërve Gërvalla [dokument]

“Atentatori i vëllezërve Gërvalla e Kadri Zekës ishte Riza Salihu”

 “Unë nuk kam njohuri për dosjen gjermane, sepse unë jam dëshmitar. Jam intervistuar shumë herë nga hetuesia gjermane. Së fundi, para rreth një viti”, ka thënë Kelmendi në një intervistë për "Tribuna". Ai thekson se është i bindur se vrasësi i vëllezërve Gërvalla dhe Kadri Zekës, është Riza Salihu, derisa shton se nuk e di kush është personi në Qeveri, që lidhet me ketë vrasje siç pretendon Donika Gërvalla

Organet gjermane të hetuesisë po i vazhdojnë hetimet për atentatin nga i cili kanë humbur jetën vëllezërit Jusuf e Bardhosh Gërvalla si dhe Kadri Zeka. Konfirmimi vjen nga një aktivistë tjetër i atëhershëm i emigrantëve shqiptarë, Ibrahim Kelmendi. Njeriu që ka të shkruar një libër për atentatin, që ka treguar me emër e mbiemër se kë e sheh si atentator, është dëshmitar i rastit.

Në një intervistë për gazetën Tribuna ai nuk ka përmendur emra të njerëzve që mund të jenë të përfshirë në vrasjen e tre heronjve, përpos Riza Salihut, derisa ka thënë se intervistimi i fundit nga organet gjermane i ka ndodhur hiq më larg se para një viti, duke konfirmuar kështu vazhdimin e hetimeve.

Në intervistë, Kelmendi ka vlerësuar paraqitjen e fundit të vajzës së heroit Jusuf Gërvalla, Donika Gërvallës, derisa ka treguar detaje të funksionimit të atëhershëm të diasporës shqiptare.

Megjithatë, njeriu që di shumë rreth vrasjes nuk është optimist se drejtësia do të vihet në vend.

Tribuna: Për ata që nuk ju njohin, cilat kanë qenë lidhjet tuaja me vëllezërit Gërvalla dhe me Kadri Zekën?

Kelmendi: Me Jusufin, Kadriun e Bardhoshin kemi qenë shokë e bashkëveprimtarë, që kur jemi takuar e njohur. Vet fakti që çastet e fundit të jetës i kemi kaluar së bashku, në shtëpi të Vëllezërve Gërvalla, besoj, dëshmon afërsinë tonë në bashkëveprimtari e jetë.

Tribuna: A mund të na shpjegoni si funksiononte atëherë diaspora shqiptare?

Kelmendi: Unë di të flas për emigracionin shqiptar, sepse diasporë shqiptare kemi kryesisht në Itali, Greqi, Turqi e SHBA. Veprimtarinë politike në Gjermani e kam filluar në vitin 1977, krahas studimeve. Në vitin 1978 jam njohur me Bardhin, në dhjetor 1979 me Jusufin, kurse në prill 1981 me Kadriun. Ne kemi vepruar në meset e emigracionit ekonomik, nuk kemi pas kontakte me emigracionin e vjetër politik. Jemi angazhuar ta ndërgjegjësojmë dhe angazhojmë emigracionin ekonomik në Gjermani, Zvicër, Belgjikë dhe shtete të tjera.

Tribuna: A kishte përçarje?

Kelmendi: Në radhët tona dhe mes organizimeve tona nuk kishte. Përjashtim është bëjnë dy muaj, nëntor dhe dhjetor 1981, kur qe shkaktuar një keqkuptim e ftohje në mes të Jusufit e Kadriut. Këtë e pat imponuar Sabri Novosella, i cili ishte udhëheqës i Organizatës në të cilën ishte i angazhuar Jusufi. Në dasmën e Kadriut dhe Saime Isufit u shpjeguan angazhimet përçarëse e diversioniste të Sabriut dhe dy-tre vetave në Gjermani. Jusufi na ftoi Kadriun dhe mua që të shkonim më 16 janar 1982 te ai. Në mëngjesin e 17 janarit vendosëm bashkimin e organizimeve tona. Fatkeqësisht SDB/UDB-ja bëri atentatet vrastare dhe, pos vrasjeve të udhëheqësve, goditi rëndë edhe Bashkimin që arritëm. Tek në vitin 1984 ia dolëm ta konsolidojmë Lëvizjen mbi bazat e përcaktimeve të Bashkimit më 17 janar 1982.

Tribuna: Kush ishte cak i atentatit dhe pse?

Kelmendi: Nuk e di kush duhet të ketë qenë cak i atentateve, sepse për atentate janë marrë vendimet në Beograd. Mendoj se i rrezikuar, brenda e jashtë Kosove, ka qenë secili veprimtar, nëse organet policore nuk kanë mundur ta arrestojnë, torturojnë, dënojnë.

Tribuna: A jeni ende të bindur se atentatori është Riza Salihu?

Kelmendi: Vazhdoj të dyshoj, bile edhe të jem i bindur, sepse këtë bindje kishte edhe hetuesia gjermane dhe gjykata në Shtutgart, ku i është bërë proces gjyqësor. Nuk kanë mundur ta përmbyllin procesin gjyqësor, sepse nuk mund t’i sillnin dëshmitarët nga Kosova e Jugosllavia. E kanë përzënë pastaj nga Gjermania, pasi pati vuajt gati dy vite burg. Unë kam qenë dëshmitar i hetuesisë edhe në proces gjyqësor.

Tribuna: A e njihnit ju në atë kohë Salihun dhe çfarë raporte kishit me të?

Kelmendi: Po, e kam njohur dhe kam pas dy-tre takime me të gjatë vitit 1979. Njohjen dhe takimet i ka aranzhuar Bashkëveprimtari Hysen Gega. Nuk jemi marrë vesh, jemi armiqësuar qysh në komunikimet e takimet e para. Pastaj ai është angazhuar të bëjë survejimin tonë. Është kapur në flagrancë nga policia gjermane në verë të vitit 1980 dhe është burgosur.

Tribuna: A e keni parë intervistën e Donika Gërvallës se çfarë mendoni për paraqitjen e saj?

Kelmendi: Po. Unë rezervohem të jap vlerësime konkrete për Zonjën Gërvalla për hir të kaluarës sonë. Në këtë intervistë ajo ka shkëlqyer si oratore, e informuar, e guximshme, e zgjuar, e zhdërvjelltë, përjashto disa ç’vlerësimeve tepër të ashpra, ta zëmë në relacion me zotëri Ramush Haradinajn dhe zotëri Albin Kurtin.

Tribuna: A keni njohuri për dosjen e organeve gjermane që e përmendi Donika?

Kelmendi: Unë nuk kam njohuri për dosjen gjermane, sepse unë jam dëshmitar. Jam intervistuar shumë herë nga hetuesia gjermane. Së fundi para rreth një viti.

Tribuna: Kush është zyrtari qeveritar i përfshirë në vrasje?

Kelmendi: Nuk e di.

Tribuna: Kur mendoni se do të vihet drejtësia në vend për atentatin?

Kelmendi: Drejtësia nuk do të vihet në vend asnjëherë, sepse vendimmarrësit dhe urdhërdhënësit për ato atentate vrastare i përkisnin kreut të pushtetit në Beograd dhe shumica e tyre nuk jetojnë më. Uroj, të paktën, të zbulohen e dënohen dorasit dhe spiunët e logjistikës së tyre.

************************

(teksti integral i intervistës, siç e ka autorizuar z.Ibrahim Kelmendi):

Pyetje: Për ata që nuk ju njohin, cilat kanë qenë lidhjet tuaja me vëllezërit Gërvalla dhe me Kadri Zekën?

Përgjigje: Me Jusufin, Kadriun e Bardhoshin kemi qenë shokë e bashkëveprimtarë, që kur jemi takuar e njohur. Vet fakti që qastet e fundit të jetës i kemi kaluar së bashku, në shtëpi të Vëllezërve Gërvalla, besoj, dëshmon afërsinë tonë në bashkëveprimtari e jetë.

Pyetje: A mund të na shpjegoni si funksiononte atëherë diaspora shqiptare?

Përgjigje: Unë di di të flas për emigracionin shqiptar, sepse diasporë shqiptare kemi kryesisht në Itali, Greqi, Turqi e SHBA.

Veprimtarinë politike në Gjermani e kam filluar në vitin 1977, krahas studimeve. Në vitin 1978 jam njohur me Bardhin, në dhjetor 1979 me Jusufin, kurse në prill 1981 me Kadriun. Në kemi vepruar në meset e emigracionit ekonomik, nuk kemi pas kontakte me emigracionin e vjetër politik. Jemi angazhuar ta ndërgjegjësojmë dhe angazhojmë emigracionin ekonomik në Gjermani, Zvicër, Belgjikë dhe shtete të tjera.

Pyetje: A kishte përçarje?

Përgjigje: Në radhët tona dhe mes organizimeve tona nuk kishte. Përjashtim është bëjnë dy muaj, nëntor dhe dhjetor 1981, kur qe shkaktuar një keqkuptim e ftohje në mes të Jusufit e Kadriut. Këtë e pat imponuar Sabri Novosella, i cili ishte udhëheqës i Organizatës në të cilën ishte i angazhuar Jusufi. Në darsmën e Kadriut dhe Saime Isufit u shpjeguan angazhimet përçarëse e diversioniste të Sabriut dhe dy-tre vetave në Gjermani. Jusufi na ftojë Kadriun dhe mua që të shkonim me 16 janar 1982 të ai. Në mëngjesin e 17 Janarit vendosëm bashkimin e organizimeve tona. Fatkeqësisht SDB/UDB-ja bëri atentatet vrastare dhe, pos vrasjesjeve të udhëheqësve, goditi rëndë edhe Bashkimin që arritëm. Tek në vitin 1984 ia dolëm ta konsolidojmë Lëvizjen mbi bazat e përcaktimeve të Bashkimit më 17 Janar 1982.

Pyetje: Kush ishte cak i atentatit dhe pse?

Përgjigje: Nuk e di kush duhet të ketë qenë cak i atentateve, sepse për atentate janë marrë vendimet në Beograd. Mendoj se i rrezikuar, brenda e jashtë Kosove, ka qenë secili veprimtar, nëse organet policore nuk kanë mundur ta arrestojnë, torturojnë, dënojnë.

Pyetje: A jeni ende të bindur se atentatori është Riza Salihu?

Përgjigje: Vazhdoj të dyshoj, bile edhe të jem i bindur, sepse këtë bindje kishte edhe hetuesia gjermane dhe gjykata në Shtutgart, ku i është bërë proces gjyqësor. Nuk kanë mundur ta përmbyllin procesin gjyqësor, sepse nuk mund t’i sjellnin dëshmitarët nga Kosova e Jugosllavia. E kanë përzënë pastaj nga Gjermania, pasi pati vuajt gati dy vite burg. Unë kam qenë dëshmitar i hetuesisë edhe në proces gjyqësor.

Pyetje: A e njihnit ju në atë kohë Salihun dhe çfarë raporte kishit me të?

Përgjigje: Po, e kam njohur dhe kam pas dy-tre takime me te gjatë vitit 1979. Njohjen dhe takimet i ka aranzhuar Bashkëveprimtari Hysen Gega. Nuk jemi marrë vesh, jemi armiqësuar qysh në komunikimet e takimet e para. Pastaj ai është angazhuar të bëjë survejimin tonë. Është kapur në flagrancë nga policia gjermane në verë të vitit 1980 dhe është burgosur.

Pyetje: A e keni parë intervistën e Donika Gërvallës se çfarë mendoni për paraqitjen e saj?

Përgjigje: Po. Unë rezervohem të jap vlerësime konkrete për Zonjën Gërvalla për hir të kaluarës sonë. Në këtë intervistë ajo ka shkëlqyer si oratore, e informuar, e guximshme, e zgjuar, e zhdërvjelltë, përjashto disa ç’vlerësimeve tepër të ashpra, ta zëmë në relacion me Zotëri Ramush Haradinajn dhe Zotëri Albin Kurtin.

Pyetje: A keni njohuri për dosjen e organeve gjermane që e përmendi Donika?

Përgjigje: Unë nuk kam njohuri për dosjen gjermane, sepse unë jam dëshmitar. Jam intervistuar shumë herë nga hetuesia gjermane. Se fundi para rreth një viti.

Pyetje: Kush është zyrtari qeveritar i përfshirë në vrasje?

Përgjigje: Nuk e di.

Pyetje: Kë aludim në moshën që kanë zyrtarët qeveritar, del se nga këta aktualët në hierarkinë e lartë mund të jenë Behgjet Pacolli ose Bujar Bukoshi. Po flasim vetëm për çështje moshe. A është ndonjëri prej tyre? Nëse po, cili?

Përgjigje: Nuk e di. Moshën e kanë për të qenë të mundshëm.

Pyetje: Për zotin Pacolli kanë shkruar edhe disa media online.

Përgjigje: I kam përcjell, por nuk mund t’i komentojë, sepse nuk kam prova. Nuk e fsheh, vazhdimisht kam dyshuar se është njeri me peshë i Beogradit, bile se ka zhvilluar biznes partneriteti edhe me vëllain e Sllobodan Millosheviqit, ish-ambasador në Moskë, i cili ia ka hapur dyert e angazhimeve ndërtimore MABETEX-it edhe në Kremlin.

Pyetje: Kur mendoni se do të vihet drejtësia në vend për atentatin?

Përgjigje: Drejtësia nuk do të vihet në vend asnjëherë, sepse vendimmarrësit dhe urdhërdhënësit për ato atentate vrastare i përkisnin kreut të pushtetit në Beograd dhe shumica e tyre nuk jetojnë më. Uroj, të paktën, të zbulohen e dënohen dorasit dhe spiunët e logjistikës së tyre.