KELMENDI: DONIKA PËR
KRYETARE TË LDK’SË
Express; 16 Janar 2014
Ibrahim Kelmendi, mik i
Jusuf e Bardh Gervalles, duke komentuar intervistën e Donika Gërvallës dhënë
mbrëmë në KTV, ka thënë për Gazetën Express se është intervistuar nga hetuesia
gjermane lidhur me ketë vrasje. Kelmendi thotë se emrat që hetuesia gjermane i
ka përmendur këtij nuk janë pjesë e Qeverisë.
Express: Cili është
vlerësimi juaj për intervistën e mbrëmshme të Donika Gërvallës, bijës së
Jusufit?
Kelmendi: Zonja Gërvalla
shfaqi oratori dhe guxim, shfaqi bagazh të madh informimi dhe shkathtësie
politike. Vetëkuptohet, si kuadër e LDK-së, ajo u angazhua për të afirmuar
subjektin që i përket. Nuk di të ketë LDK-ja kuadër më të shkathët dhe prandaj
do të ishte më e merituara për të qenë kryetare e saj.
Express: Ajo tha se në
dosjen e hetimeve për vrasjen e Jusufit, Bardhoshit e Kadrisë ka emra edhe të
Qeverisë aktuale. A e dini se kush është ai emër?
Kelmendi: Po, e tha, por
nuk mund të spekuloj për cilin e kishte fjalën. Rëndom, qeveria përbëhet vetëm
nga Kryeministri, zv-kryeministrat, ministrat... Hetuesia gjermane mua me ka
caktuar si dëshmitar. Para disa kohëve ajo me ka takuar (Bundeskriminalamt,
shkurtesa BKA/Enti Federativ i Kriminalistikës), më kanë pyetur edhe për disa
emra të ri, për të cilët po hetonte si të dyshuar, por ata nuk janë pjesë e
qeverisë.
Express: Më herët e keni
përmendur një emër si vrasës i mundshëm i Jusufit, Bardhoshit e Kadrisë, por
keni paralajmëruar se është edhe një emër tjetër si i dyshuar. A e ka fjalën
për të njëjtin edhe Donika?
Kelmendi: Jo, nuk është.
Emrin e të dyshuarit të dytë ia kam dhënë BKA-së.
Express: Ajo e quajti
Ramush Haradinajn kriminel ordiner të paqes, ndërsa Albin Kurtin fashist. Po
ashtu për PDK'në tha se është e keqja e madhe e këtij vendi. Cili është
vlerësimi juaj, si mik dhe shok i Jusufit, pse po i bën këto deklarata vajza e
tij?
Kelmendi: Gjykoj se janë
(ç)vlerësime kryesisht politike, në cilësi të pozicionit që ka në LDK.
Express: A ka pasur
lëvizje të prokurorisë dhe hetuesisë në lidhje me deklaratat që keni dhënë më
herët për vrasjen e Jusufit, Bardhoshit e Kadrisë?
Kelmendi: Nëse e keni
fjalën për institucionet e Kosovës, në denoncimin që kam bërë, kam marrë
përgjigje me shkrim vetëm nga Prokuroria Speciale e Kosovës, kurse nga
Prokuroria e Përgjithshme nuk kam asnjë përgjigje e reagim, ndërsa sa u përket
institucioneve gjermane, informova më lartë, më ka kontaktuar BKA.
Express: Pse s'po zbardhen
këto vrasje?
Kelmendi: Nuk kam përgjigje
konkrete. Dilemat e mia janë të shumta. Vendimi për vrasje duhet të jetë marrë
në kreun e regjimit të ish-Jugosllavisë dhe prandaj hetuesia gjermane ende nuk
po ia del të sigurojë prova konkrete. Uroj që Shteti i Kroacisë do të dorëzojë
në Gjermani ish-kryeshefin e SDB-së federative, Zdravko Mustaq. Uroj që ai të
ketë kurajë qytetare për të ndihmuar hetuesinë gjermane që të konstatohet kush
nga kreu i Jugosllavisë e ka dhënë urdhrin për vrasje dhe cilët janë dorasit.
Prokuroria e Përgjithshme e Republikës së Kosovës ka rastin për të ndihmuar
hetuesinë gjermane, duke u angazhuar si përgjigje ndaj denoncimit tim.
Express: A prisni që të
zbardhen të gjitha vrasjet politike, si në kohën e ish-Jugosllavisë ashtu edhe
në atë të kohës së pasluftës?
Kelmendi: Do të dëshiroja. Jam skeptik.
Kommentare
Kommentar veröffentlichen