JO hakmarrjes dhe revanshizmit...
Shkruan: Ibrahim Kelmendi
(Fragmente të veprimtarisë
së UDB-së në emigracion)
Duke u nisur nga parimi se
shoqëria jonë sapo ka dalë nga një proces që mund të quhet KTHESË në
perceptimin e përvojës historike, shtrohet si domosdoshmëri përballimi me tri
fenomene: Me dukurinë e TRURIT TË SHPËLARË; Me dukurinë e SHKARKIMIT TË
URREJTJES SË AKUMULUAR dhe Me DUKURINË E NDJESËS, TË PENDESËS DHE TË FALJES.
Nisur nga përvoja personale, thënë pa modesti, goxha e begatë, nga leximet dhe
përvojat e popujve me histori shëmbëllyese, do ta përvijoj opinionin tim,
gjithnjë me konsideratën se nuk duhet vonuar dhe as shpërfillur gjykimin për
çështjet që shtrohen. E zura ngoje më herët çështjen e kohës, me pretendim
zbutjeje, sado që nuk është i pakët as intervali prej pesëmbëdhjetë vjetëve.
Kualifikimi TRANZICION i këtij intervali na përballë me rrezikun e adaptimit të
pafalshëm me status quon. Pashmagshëm shtrohet impakti i një fundi: sot dhe
këtu! Në çdo variant këmbëngul: Jo hakmarrje dhe revanshizëm!
Edhe konkretizimi i
angazhimit të UDB-së në emigracion mund të dëshmojë se sa të vështirë e ka shoqëria
jonë ta përpunojë të kaluarën e afërt. Edhe më të vështirë e ka të marrë
qëndrime konkrete, ndëshkuese, sidomos ndaj ish-nomenklaturës komuniste dhe
ish-UDB-së së KSA të Kosovës. Për ta argumentuar këtë konstatim do të sjell
fragmente nga ballafaqimet, informimet, (ç)vlerësimet dhe përjetimet, të
ndodhura në të kaluarën. Ndihem i detyruar t’i ofroj këto shpjegime sepse, kur
paraqita opinionin për një si catarsis (pastrim shpirti), rrjedhimisht për një
pajtim kolektiv, ose paqësim kolektiv, në komentet e shumta publike në “rrjetin
social” (FB) pati edhe kundërshti serioze, disa prej të cilave përmbanin fuqi
argumentuese. Ende më interesante qenë reagimet përkrahëse ose kundërshtuese,
të shprehur në komunikim intern, që të mos mund t’i dijë publiku. E vetëkuptueshme,
tematikë e rëndë, prandaj individë të rezervuar e konformistë, o zgjedhin
heshtjen, o shprehin opinione që nuk duhet t’i di publiku i gjerë.
Me dëshirë do të kisha
filluar t’i ofroj edhe rrëfimet e prindërve si, ta zëmë, se çfarë peripecish ka
pasur babai im për të mbijetuar për shkak të angazhimeve të tij çlirimtare
gjatë Luftës së Dytë Botërore (LDB). Por, ajo që më ka drithëruar akoma më
shumë është dhjetori i vitit 1956, kur nëna i është lutur Zotit që të më
vdiste, duke mos mundur t’i përballonte tmerret e fatkeqësisë sime. Pra, në atë
dhjetor të kobshëm, në moshë rreth 15-muajsh, bie në vatër të oxhakut dhe
digjem i tëri nga beli e sipër. Kjo ndodh kur babanë e kishte arrestuar UDB-a
famëkeqe dhe e mbante të lidhur për trup të kumbullës në oborr të stacionit të
policisë në Kliqinë (Pejë). Ndodhi në atë dhjetor të mallkuar që, si për inat,
ishte tepër i acartë. Në pamundësi të më dërgonin menjëherë për mjekim,
sëmundja nga ajo djegie zgjat gati tre vjet.
Për atë kohë e ato vuajtje
që i ka shkaktuar UDB-a popullit tonë është shkruar goxha shumë, por nuk janë
ndriçuar të gjitha. Kujt t’i kërkoj tani llogari për ato krime dhe të tjerat,
të mëvonshme, ndaj nënës, vëllezërve e motrave, kushërinjve, popullit, që i ka
bërë UDB-a!? Unë ndihem i plotësuar: Çlirimi i Kosovës ishte hakmarrja më e
vyer.
Meqë u përcaktova ta
paraqes veprimtarinë e UDB-së në emigracion, duke sjell ballafaqimet,
përjetimet dhe informimet që kam mbledh nga të tjerët, po kapërcej gjithë ato
që di e kam përjetuar deri në qershor të vitit 1976, në prag të arratisjes.
Paraprakisht po informoj edhe për një ndodhi, nga e cila do të shihet se
përpunimi i së kaluarës sonë të afërt vetëm në dukje është i lehtë.
Më 26 ose 27 nëntor 1975
rreth 40 studentë të fizikës, viti i 3-të, bëmë një protestë të vockël,
pothuajse aksidentale. Kërkuam që në vend të profesorëve serbë nga Beogradi e
Nishi, të na silleshin profesorë nga Tirana, sipas marrëveshjes mes dy
universiteteve tona. Shkak ishte një diskriminim që na pat bërë një profesor
serb. Ajo protestë u politizua panevojshëm nga nomenklatura e atëhershme
komuniste, e cila me nxitim e gjykoi si protestë nacionaliste, në prag të
festës së 28 Nëntorit, edhe pse asnjëri nga protestuesit as që e kishte menduar
që protesta të ketë karakter patriotik e politik.
Për dënimin e protestës si
më të zellshëm u shquan prof. Rexhep Gashi, shef i katedrës së Fizikës, Mahmut
Alidemaj, kryetar i Lidhjes së Rinisë Socialiste të Fakultetit të Shkencave
Matematikore-Natyrore (FSHMN), Gani Jashari, sekretar i asaj Lidhjeje.
Politizimi eskaloi deri në atë nivel, sa Lidhja Komuniste e FSHMN-së, në
qershor të 1976-s, të mbante mbledhje për të marrë vendim dënues, që pastaj të
angazhohej UDB-a. Në mbledhje mori pjesë edhe Dragan Cvijiq, kryetar i Lidhjes
së Rinisë Socialiste të KSA të Kosovës, rektori Dervish Rozhaja dhe funksionarë
të Lidhjes Komuniste të Prishtinës. Mbledhjen e kryesonte sekretari i Lidhjes
Komuniste të FSHMN, prof. Muhamet Bicaj. Në mbledhje po merrja pjesë edhe unë,
si një nga të fajësuarit për organizim të protestës. Gjatë diskutimeve filluan
të përvijohen dy fraksione, ai mbrojtës, tjetri dënues. Në mbrojtje na dolën
rektori Rozhaja, prof. Asllan Pushka, prof. Mustafë Bacaj etj., kurse dënues
prof. Rexhep Gashi, prof. Muhamet Bicaj, Gani Jashari, Mahmut Alidemaj etj.
Nga frika se në fund të
mbledhjes do të operonte UDB-a, dola sikur po shkoja në banjë, por ika pa u
përshëndet me njeri, shkova në Fushë-Kosovë, i hipa trenit për në Gjermani.
Konstatime: E para, edhe
ajo mbledhje dëshmon se Lidhja Komuniste e ushtronte pushtetin monist. E dyta,
të dyja palët e konfrontuara në atë mbledhje i kishte dhe i kanë ithtarët e
tyre, bile pjesëtarët e palës dënuese ndoshta kanë më shumë ithtarë sesa
pjesëtarët e palës mbrojtëse. Prandaj nuk ia vlen të konfrontohemi tani mes
nesh, edhe për faktin se mund të dalin të fituar komunistët më të angazhuar
shqiptaro-jugosllavë dhe ithtarët e tyre. Akoma më e konkretisht: më i fituar
doli dhe është, ta zëmë, prof. Muhamet Bicaj sesa prof. Mustafë Bacaj, sepse i
pari u katapultua në kreun pushtetit monist, por edhe në qeverinë virtuale
“demokratike” (1990-1998) dhe po të garonin edhe tani mes tyre për vota, do të
dilte i fituar prof. Muhamet Bicaj. Ja, fatkeqësisht, këtë mendësi duhet të
ketë shoqëria jonë tani.
Sikur rezulton se nuk
kishim të bënim vetëm me një ish-Lidhje Komuniste homogjene, monolite, dhe as
me një UDB homogjene, e cila komandohej nga kreu i LKK-së. Ato përbëheshin nga
pjesëtarë të tyre, që dallonin mes tyre. Kjo bën që njerëzit të rezervohen për
t’i gjykuar njësoj të gjithë pjesëtarët e ish-strukturave të atij sistemi
monist e pushtues. Pason edhe e vërteta tjetër: të gjithë pjesëtarët e asaj
nomenklature komuniste nuk e kanë përzgjedhur me dëshirë atë sistem, ai ishte i
imponuar edhe përdhunshëm. Ky fakt të detyron të mendosh njerëzishëm, se shumë
pjesëtarë të hallkave të atij sistemi ishin njëkohësisht viktima, edhe pse të
privilegjuara materialisht.
Në vazhdim do të sjell
shembuj nga pala e të përndjekurve, për të parë se edhe kjo palë nuk ishte
gjithaq homogjene, për të pasur të drejtë morale të trajtohet kolektivisht si e
përndjekur dhe prandaj, si palë, të kërkojnë hakmarrje e revanshizëm ndaj
nomenklaturës së atij sistemi. Një shumësi e madhe e pjesëtarëve të kësaj pale
madhëron disa individë, me arsyetim se kanë qenë kundërshtarë politikë e
çlirimtarë kundër atij sistemi e regjimi, që do të thotë se kanë qenë
veprimtarë çlirimtarë por, në fakt, rezulton të mos kenë qenë të tillë.
Hasan Hoxha në gosti me
ish-shefin e UDB-së së Malit të Zi
Në verë të vitit 1974 ose
’75 isha për vizitë në fshatin Vuthaj (buzë Gicisë), meqë nga ai fshat ka
prejardhje familja jonë). Duke qenë vizitor te kushëriri Jusuf (Zeqir) Bruçaj,
vendosim të shkojmë për vizitë te kushërinjtë e tjerë, që verës rrinin në
bjeshkë, e quajtur Fusha e Cirme (panë kufirit me RPS të Shqipërisë). Një motiv
më tepër për të shkuar ishte edhe prania e mysafirit Hasan Hoxha atje. Me
origjinë ai ishte nga rrethi i Tropojës, i arratisur nga Shqipëria në Mal të Zi
pas LDB-së. Në ndërkohë ishte bërë dhëndër yni. Jusufi e njihte atë nga vizitat
e mëparshme. Nga ai kishte marrë libra “të ndaluar”, që i kishte botuar
emigracioni politik “djathtistë”. Gjatë vajtjes Jusufi ma prezantoi Hasanin,
duke e lavdëruar si kuadërpatriot, meqë ishte kryetar i Partisë Legaliteti,
Dega në Belgjikë. Kur arritëm atje së pari ia mësymë dëbanit (stanit) të
kushëririt më të moshuar, Sokol (Avdi) Bruçaj. E gjetëm buzë vatre, të
mërzitur, edhe pse shquhej si plak i hareshëm dhe orator. Ofshani kur na pa:
“Keni ardhur në një ditë të zezë për familjen tonë, sepse sot kemi mysafir
ish-shefin e UDB-së së Malit të Zi. Ka ardhur për ta nderuar dhëndërinë tonë,
Hasan Hoxhën. Ata po bëjnë kokrrën e sefasë nën hijen e horomoçit, para stanit
tjetër, ku është shtruar gostia...”. Jusufi turfulloi: “Hasanin e dija për
patriot...”. Mixha Sokol na informoi për angazhimet e shumë shqiptarëve të
arratisur nga Shqipëria, të cilët i kishte përvetësuar UDB-a nëpërmjet
shantazhit, o të angazhoheshin t’i shërbenin asaj, o do t’i kthente në Shqipëri.
Jusufi pastaj rrëfeu edhe
për të motrën e vet, të martuar për vëlla të Hysen Prushit në fshatin Prush të
Gjakovës (buzë kufiri). Ajo familje shquhej si bazë e UDB-së. Bile rrëfeu se
kishte provuar ta bindte motrën ta vriste kunatin Hysen Prushi për krimet që
kishte bërë, por ajo nuk kishte pranuar.
Në vitin 1978 shkova për
vizitë në Bruksel me Hysri Rekën (Nerodime e Ferizajt), sepse ai e kishte atje
vëllain, Basriun. Unë ndeja disa ditë aty, kurse Hysriu u kthye, sepse duhej të
punonte. Kishim me vete edhe material propagandistik që t’ua shpërndanim
bashkatdhetarëve. Nëpërmjet Basriut njoha shumë bashkatdhetarë, kryesisht
shqiptarë nga Turqia. Njoha edhe dy luftëtarë veteranë të LDB-së: Gjelë e Hysen
(Xhelili) Kalishta, nga rrethi i Tetovës. Gjela kishte qenë disa vjet kryetar i
Lidhjes së Dytë të Prizrenit, Dega në Belgjikë. Prej tyre dëgjova shumë për
emigracionin politik në Belgjikë, dëgjova edhe për dhëndrin Hasan Hoxha,
kryetar i Legalitetit aty. Secili me keqardhje thoshte se emigracionin politik në
Belgjikë e kontrollonte dhe e dirigjonte UDB-a.
Një ditë me Basriun shkuam në një kafe, e cila përflitej si vendtakim i
zogistëve. Aty gjetëm Muharrem Bajraktarin, për të cilin kisha lexuar se ka
komanduar vrasjen e Bajram Currit, duke qenë mercenar i Mbretërisë Jugosllave.
Tani isha kureshtar për të dëgjuar nga gojë e tij për atë krim. Ai rrëfeu me
krenari se kishte komanduar vrasjen e “komunistit” Bajram Curri. Përbetohej se
do ta përjetonte çlirimin e Shqipërisë (edhe pse dukej se nuk kishte rrojtje të
gjatë) me ndihmë edhe të Beogradit. Posa mbaroi rrëfimin, i thash se brezit të
ri në Kosovë nuk i intereson lufta për pushtet në Shqipëri, por çlirimi i
Kosovës nga pushtimi jugosllav. Ai dhe të tjerët që ishin aty më bombarduan me
marrëzitë: “Ju kuçaloshët e Enverit nuk jeni të vetëdijshëm se më të mirë e
keni jetën në Jugosllavi sesa në Shqipëri...”.
Po në atë kafe pata takuar dhëndrin Hasan Hoxha. E rikujtuam vizitën e tij në Vuthaj. Ai më fodullëk
fliste se me ndihmën e Beogradit do ta çlironin Shqipërinë nga diktatura
komuniste, siç e kishte çliruar Ahmet Zogu nga “revolucioni bolshevik” i Nolit.
Në akuzën time se kishte mik ish-shefin e UDB-së republikane të Malit të Zi, ai
qe arsyetuar: “Edhe Nderim Kupi, kryetar i Partisë Legaliteti, ka studiuar e jetuar
shumë vite në Beograd, bile gjithnjë ka banuar në hotel ‘Slavia’, sepse
Beogradi ndihmonte dhe e ndihmon Legalitetin për ta çliruar Shqipërinë nga
diktatura komuniste...”. Ai nuk turpërohej se partia e tij, Legaliteti, kishte
poltron një regjim të njëjtë komunist, monist, pos kësaj edhe pushtues e
sundues të trojeve shqiptare.
Tani, të gjithë këta
individë, kanë rreth të gjerë njerëzish që i admirojnë, prandaj gjithsesi është
e dëmshme të ndodhin konfrontime në kohë të tanishme.
“Besëlidhja Shqiptare” e
Emin Fazliut
Në semestrin veror të
vitit 1977, me ndihmë të albanologut kroat dr. Lazar Dodiq (nga Janjeva e
Kosovës), u regjistrova në Universitetin e Bochumit. Aty pata rast ta takoj
veprimtarin kroat Damir Petriq, ish-udhëheqës i lëvizjes studentore të Splitit
në vitin 1971. Ai më informoi për organizatën “Besëlidhja Shqiptare” dhe
kryetarin e saj Emin Fazlia, alias Emil Kastrioti (nga rrethi i Mitrovicës). Më
dha edhe materiale propagandistike të asaj organizate. Më shumë se dy të tretat
e shkrimeve u dedikoheshin kampeve e diktaturës në Shqipëri, vetëm tek-tuk
ndonjë shkrim i vogël për Kosovën.
Duke i frekuentuar veprimtaritë e emigracionit kroat, u informova akoma më shumë. Në një protestë të tyre, në vitin 1978, takova Eminin. Nga ai u (dez)informova se “kryesisë” së asaj organizate i përkisnin edhe Vebi Ibrahimi (Unglar, Gjilan), Maliq Cakaj (ish-nëpunës i konsullatës jugosllave në Dortmund, Gjermani), Fekë Dautaj (Kodrali, Deçan), Avdullah Jusufi etj. Në ndërkohë u informova se Emini, Vebia, Maliqi, ndoshta edhe Avdullahu i kishin bashkëshortët serbe. Për mua ishte argument i mjaftueshëm për të krijuar dyshime fillestare, sepse në atë kohë patriotët shqiptarë nuk martoheshin me serbe, aq më pak ata që pretendonin të kishin themeluar në organizatë patriotike me emër aq pompoz. Dyshimet në atë organizatë u përvijuan me shumë kur u informova se Fekë Dautaj, edhe pse gjysmanalfabet, ishte caktuar redaktor i broshurës “Besëlidhja shqiptare” (organ i asaj organizate). Për Fekën dija qysh në vitet e ’60-ta, se kishte qenë bashkëpunëtor i UDB-së në Pejë dhe si i komprometuar i ishte bërë gjyq. Kishte qenë bashkëveprimtar edhe me një farefis timin me nofkën “sialica”. Emini më kishte gënjyer se kishte studiuar filozofi në Zagreb. E zbulova nëpërmjet zv/rektorit të atij Universiteti, që ishte një vit profesor mysafir në Universitetin e Bochumit. Në ndërkohë çfarë nuk (dez)informonin njëri kundër tjetrit, sa herë që i takoja veç e veç.
Duke i frekuentuar veprimtaritë e emigracionit kroat, u informova akoma më shumë. Në një protestë të tyre, në vitin 1978, takova Eminin. Nga ai u (dez)informova se “kryesisë” së asaj organizate i përkisnin edhe Vebi Ibrahimi (Unglar, Gjilan), Maliq Cakaj (ish-nëpunës i konsullatës jugosllave në Dortmund, Gjermani), Fekë Dautaj (Kodrali, Deçan), Avdullah Jusufi etj. Në ndërkohë u informova se Emini, Vebia, Maliqi, ndoshta edhe Avdullahu i kishin bashkëshortët serbe. Për mua ishte argument i mjaftueshëm për të krijuar dyshime fillestare, sepse në atë kohë patriotët shqiptarë nuk martoheshin me serbe, aq më pak ata që pretendonin të kishin themeluar në organizatë patriotike me emër aq pompoz. Dyshimet në atë organizatë u përvijuan me shumë kur u informova se Fekë Dautaj, edhe pse gjysmanalfabet, ishte caktuar redaktor i broshurës “Besëlidhja shqiptare” (organ i asaj organizate). Për Fekën dija qysh në vitet e ’60-ta, se kishte qenë bashkëpunëtor i UDB-së në Pejë dhe si i komprometuar i ishte bërë gjyq. Kishte qenë bashkëveprimtar edhe me një farefis timin me nofkën “sialica”. Emini më kishte gënjyer se kishte studiuar filozofi në Zagreb. E zbulova nëpërmjet zv/rektorit të atij Universiteti, që ishte një vit profesor mysafir në Universitetin e Bochumit. Në ndërkohë çfarë nuk (dez)informonin njëri kundër tjetrit, sa herë që i takoja veç e veç.
Për t’u hakmarrë kundër meje për kërcënimin që i kisha bërë Fekë
Dautajt, në vitin 1979 Emin Fazlia boton një shkrim dezinformues në gazetën
“Hrvatska Drżava” (e botonte një organizatë kroate), se unë isha pjesëtar i
RAF-it gjerman (Rote Army Fraktion / Fraksion i Ushtrisë së Kuqe). Pason
tentativa për të më arrestuar policia speciale gjermane GSG9, por bllokohet nga
studentët e konviktit. Në fund rezulton se ai aksion ishte ndërmarrë duke u
bazuar në atë shkrim.
Për Vebi Ibrahimin, pos që isha informuar nga bashkatdhetarët në
Bruksel, se ushtronte tregti me gjëra inkriminuese, ai u identifikua në një
flagrancë kriminale konkrete. Në qershor të 1981-s në Bruksel shkuam Kadri
Zeka, Bardhosh Gërvalla, Hisri Reka dhe unë për t’u marrë me organizimin e
demonstratës së planifikuar. Njerëz të sojit të Vebi Ibrahimit kishin
shpërndarë kërcënimin se do të derdhej gjaku, po të guxonim të organizonim
demonstratë. Shkuam me makinë të Bardhit. Ishim vendosur në banesë të Basri
Rekës. Në një moment, duke ardhur aty bashkëveprimtari, sa mbaj mend Xhemë
Haxhijaj (nga Uça e Istogut, i cili jetonte në Bruksel) sheh Vebiun duke u
marrë me makinë me targa të Gjermanisë. E pyet nëse e kishte blerë në Gjermani.
Ai, në vend se t’i përgjigjet, merr vrapin e ik. Xhema sapo hyri në banesë të
Basriut, pyeti nëse ishte makina jonë me targa gjermane, e parkuar rreth 50
metra larg hyrjes. Kur ia pohojmë, rrëfen se si e pa Vebiun që i ishte afruar
dhe po bënte diç në atë makinë.
Megjithatë, demonstrata u bë dhe kishte më shumë pjesëmarrës sesa çdo
demonstratë që ishte organizuar më herët në Bruksel (pavarësisht se Reshat
Sahitaj me ca shokë të tij thirri demonstratë tjetër sabotuese, por në atë
demonstratë morën pjesë ndoshta vetëm rreth 30 vetave). Asnjë incident nuk
ndodhi.
Vebi Ibrahimi është vrarë në Bruksel më 10 tetor 1981, por jo për
veprimtari patriotike e çlirimtare. Mbrapa la të ve bashkëshorten serbe.
Atëherë gjykuam se edhe ai ishte pjesëtar i një bande, e quajtur për kamuflim
“Besëlidhja Shqiptare”, që komandohej nga UDB-a nëpërmjet kryetarit Emin
Fazlia.
Tashmë emrin e Vebiut e mban shkolla në Uglar dhe në oborr të shkollës i
është ngritur përmendore e madhe. Për të janë sajuar lavde e këngë heroike.
Në vitin 2007 m’u botua romani “Atentatet”. Pos shumë të tjerëve, m’u
kishin hidhëruar Emin Fazliu dhe disa fshatarë të Uglarit. Për botim të romanit
kishte dhënë ndihmë 500 SFr një ish-bashkëveprimtar nga ky fshat, që jeton në
Zvicër. Ndaj tij kishin shfaqur hidhërimin disa bashkëfshatarë, pse kishte
ndihmuar botimin e romanit që baltoste heroin e tyre, Vebi Ibrahimin. Ai u
ishte përgjigj: “Nuk e kam lexuar romanin, por po të dija se ka shkruar keq për
Vebiun, do ta kisha ndihmuar edhe më, sepse unë di më shumë sesa Ibrahimi për
prapësitë e Vebiut”. Më pyeti nëse isha i gatshëm të shkoja në Uglar për të
biseduar me ata që ia kishin shfaqur hidhërimin. Shkuam. Biseduam. Më erdhi keq
për ato viktima të dezinformimeve e mashtrimeve flagrante.
Atëherë kisha bindjen se ky sojë i individëve ishin pjesëtarë të UDB-së,
prandaj ishin komanduar të merreshin me këso veprimtarish konkrete kundër
emigracionit të organizuar patriotik e çlirimtar. Vetëm spiunimi nuk u
mjaftonte, meqë ne e ushtronim publikisht pjesën më të madhe të veprimtarisë
sonë. Ishin përcaktuar edhe për operacione fizike.
Tashmë të gjithë këta individë kanë rreth të gjerë njerëzish që i
admirojnë, prandaj gjithsesi është e dëmshme të ndodhin konfrontime tani.
Konfrontimet e Klubit
Shqiptar në Dyzeldorf me UDB-në
Në vitin 1978 nëpunësi i
konsullatës jugosllave në Düsseldorf (Dyzeldorf) Zenel Syka (nga Gjakova)
ndërmerr nismën për formim të një klubi të emigrantëve tanë. Atë nismë e
kuptuam si masë preventive të UDB-së për t’i kontrolluar bashkatdhetarët tanë.
Në mbledhjen e parë themeluese ai imponon Enver Maliqin (biznesmen i madh e me
influencë në Shkup) për kryetar, kurse shumica e pjesëmarrësve votojnë Rrahman
Begën (Jezerc, Ferizaj). Mbledhja përmbyllet me konflikt. Në mbrëmje dy veta
sulmojnë Rrahmanin në banesën të tij, e plagosin me thikë dhe e kërcënojnë të
mos pranonte të bëhej kryetar. Pason mbledhja tjetër, ku kryetar zgjidhet Nebih
Reka (Nerodime, Ferizaj), sekretar Qazim Shala (rrethi i Suharekës), arkëtar
Samedin Iljazi (Tetovë) etj.
Plas konflikti rreth emërtimit:
“klub shqiptar” ose “klub jugosllav”. Konsullata jugosllave kërcënonte. Në
ndihmë të saj u paraqitën edhe “korrespondenti” Jusuf Buxhovi dhe Mitalip Çoça
(kryetar i Qendrës Kulturore Jugosllave në Köln (Këln). Nebih Reka e Qazim
Shala kërkojnë ndihmë nga Shefqet Hashani (sekretar i parë i Ambasadës
Jugosllave në Bonn). Me përkrahjen e tij fiton emërtimi Klub Shqiptar. Në vitin
1981, meqë Klubi u konfrontua sërish me konsullatën, sepse nuk pranoi t’i
dënonte demonstratat në Kosovë dhe doli hapur me kërkesën “Kosova Republikë”,
Nebih Reka, Qazim Shala, Samedin Ilazi e shumë të tjerë u burgosën kur erdhën
për vizitë në vendlindje. Po në maj të vitit 1981 u burgos në aeroport të
Beogradit edhe Shefqet Hashani, gjatë ardhjes për pushime, ai u dënua me tetë
vjet burgim.
Për t’i minimizuar
pasojat, taktizuam zgjedhjen për kryetar të Hamdi Tubës (Rrethi i Gjakovës) dhe
shokëve të tij, të cilët ishin informatorë të “diplomatit” Zenel Syka. Por pas
disa muajve zgjedhëm kryesi tjetër, të përbërë nga veprimtarë patriotë, si
Sylejman Haxhijaj (Llabjan i Pejës), Malush Ademaj (Katun i Ri, Pejë) etj. Edhe
këta u burgosën e maltretuan kur ishin për vizitë në vendlindje.
Të gjithë këta individë
kanë njerëz që i admirojnë, prandaj gjithsesi është e dëmshme të ndodhin
konfrontime në kohë të tanishme.
UDB-a: Jusuf Gërvalla është dërguar nga UDB-a...
Sapo Jusuf Gërvalla ia doli të arratiset dhe u vendos në Gjermani në
dhjetor të vitit 1979, filluan shpifjet e dezinformuese kundër tij. Më
konkretja dhe më e zëshmja: “UDB-a e ka dërguar për t’i spiunuar veprimtarët
patriotë dhe për ta përçarë emigracionin”. Këto shpifje i përhapnin të gjithë
nëpunësit e përfaqësive diplomatike jugosllave dhe spiunët e padukshëm. Por, më
i zëshmi dhe më aktivi ishte Riza Salihu, i cili, në ndërkohë, ishte afirmuar
si udhëheqës i “Grupit Komunist ‘Zëri i Kosovës’” (në Stuttgart).
Kur Jusufi arrin në Ludwigsburg, Bardhi, vëllai më i vogël i tij, më
telefonon. Ai më njofton se Jusufi ishte arratisur dhe m’u lut të shkoja në
vizitë sa më shpejt.
Me Bardhin isha njohur fizikisht një vit më herët (verë 1978), kur isha
te dhëndëri për të punuar, pas ishte përmbyll semestri i studimeve. Duke qenë
atje, Bardhi erdhi vizitë bashkëvendësve të tij, që të informohej si i kishin
hallet dhe nëse kishin nevojë për ndonjë ndihmë të tij. Ai ishte i angazhuar
pranë Arbeiterwohlfahrt (organizatë kjo gjermane, që përkujdesej për të drejtat
dhe mirëqenien e punëtorëve). Deri në atë takim nuk njiheshim. Pak ditë më vonë
me Hysen Gegën e vizitojmë Bardhoshin. Atë ditë ai po bënte muzikë me një band
gjerman, si kitarist, pranë sheshit qendror të Shtuttgartit. Hyseni e
furnizonte Bardhin me libra që i porosiste nga Tirana, ose i merrte nga
Ambasada Shqiptare në Vjenë, që Bardhi t’i fuste ilegalisht në Kosovë.
Kur shkova për vizitë në Ludwigsburg në dhjetor 1979, te zyra ku ishte i
angazhuar Bardhi, gjeta edhe Hysen Gegën dhe dy-tre veta të tjerë. Edhe ata i
kishte informuar Bardhi. Ata informuan se Riza kishte filluar të përhapte
shpifje, se “Jusuf Gërvallën e ka dërguar UDB-a për t’i spiunuar veprimtarët
patriotë dhe Grupin Komunist Zëri i Kosovës...”. Këtë e bënte me zell të
sforcuar, duke kaluar kohë të gjatë në stacion të trenit në Shtuttgart, i cili
frekuentohej shumë nga emigrantët shqiptarë. Të gjithë u habitem, nga ishte
informuar Riza aq shpejt për arratisje të Jusufit. Hyseni na tha se ishte
informuar nga Amnesty International (ai) e Londrës, siç i kishte thënë Riza.
Meqë unë kisha njohje me zonjën Melani Anderson, përgjegjëse e ai për të
burgosurit politikë në Jugosllavi, i telefonuam. Ajo sqaroi se ai ende nuk
dinte për arratisje të Jusufit.
Meqë për Rizën kisha krijuar dyshimin qysh në takim të parë (verë 1978),
se mund të ishte kuadër i UDB-së, tani analizuam këtë angazhim të tij, kush e
kishte informuar, përse shpifte dhe dezinformonte. Rëndom, unë u mundova t’i
bind se duhej të ishte informuar dhe komanduar nga eprorët e tij të UDB-së.
Këtë qëndrim timin nuk e mirëpriten Hyseni, Maksuti, sepse ata ishin të
angazhuar në atë grup, bile Riza u kishte thënë se i kishte kooptuar në Kryesi.
Vendosëm të bëjmë informim mbrojtës, duke e paraqitur Rizën se shpif e
dezinformon meqë vuan nga paranoja UDB dhe nga frika e konkurrimit që do t’i
bënte Jusufi.
Meqë UDB-a nuk ia doli ta bindë emigracionin nëpërmjet Rizës, atëherë
atij duhet t’i jetë dhënë urdhri ta likuidonte fizikisht Jusufin, sepse shumë
shpejt Jusufi ishte afirmuar si kuadër intelektual, i mirëpritur. Ndoshta në
mars 1980 (e mundshme edhe në shkurt ose prill) Riza ia komunikon Hysen Gegës
urdhrin “në emër” të grupit për vrasje të Jusufit. E kishte përzgjedh Hysenin
si më trimin e më konspirativin. Por, meqë Hyseni ishte shokë me Bardhin, në
ndërkohë edhe me Jusufin, nuk e zbatoi atë urdhër. Përkundrazi e dekonspiroi,
duke na informuar. Pasoi skenari simulues, që Hyeni ta zvarriste “atentatin”,
me arsyetime që i sajuam. Donim të zbulonim kush qëndronte prapa Rizasë. Tek në
korrik 1980 e përmbyllëm atë ngjarje të kobshme, me pleqërimin se Rizai duhej
ta ndërpriste fushatën shpifëse dhe të mos guxonte të urdhëronte njeri tjetër
për vrasje. Pjesëmarrës në atë ballafaqim e pleqërim ishin Jusuf e Bardhosh
Gërvalla, Hysen Gega, Maksut Saramati, unë dhe një koleg i Hysenit, me të cilin
banonin në të njëjtën dhomë të konviktit të punëtorëve të firmës ITT në
Esslingen.
Në verë të po atij viti Riza vodhi dërgesat që na vinin nëpërmjet poste
(Jusufit dhe mua, ndoshta edhe dy vetave, që tani nuk po më kujtohen). Këtë
vjedhje ai e realizoi nëpërmjet falsifikimeve, sikur gjoja në kishim bërë
kërkesë në postë, që dërgesat të na transferoheshin përkohësisht në postfah në
Shtuttgart, të cilin e kishte hapur Riza në emër të tij. Meqë aty po shkonin
dërgesa postare të shumë vetave, nëpunësit e postës informojnë policinë.
Policia gjermane e arreston Rizën në flagrancë.
Meqë Riza nuk po i përmbahej pleqërimit dhe për shkak të angazhimeve të
reja të tij, në nëntor 1980 u mor vendimi që “Grupi Komunist Zëri i Kosovës” të
shpërbehej. Në atë vendimmarrje morën pjesë vetë anëtarët e simpatizantët e
atij grupi, ku asistonim si mysafirë Jusufi e unë.
Edhe pas kësaj vendimmarrje Riza vazhdonte të përhapte shpifje, sidomos
kundër Jusufit e Bardhoshit.
Edhe Riza Salihu ka rreth njerëzish që e admirojnë, prandaj është e
dëmshme të ndodhin tani konfrontime.
(Uroj që ish-anëtarët e atij grupi të mos ngurrojnë të japin informata,
ku, kur dhe nga kush është themeluar “Grupi Komunist Zëri i Kosovës”, si u
udhëhoq, çfarë veprimtarie ka bërë. Mendoj se distanca kohore është e bollshme
për të pasur informata më konkrete e më të sakta. Edhe për grupe, organizata e
parti të tjera do të duhej të jepen tani të dhëna e informata, ku, kur, kush i
themeloi, si u udhëhiqen, çfarë veprimtaria kanë bërë etj.)
Jusuf Gërvalla irritohet nga spiunët e UDB-së
Pos këtyre operacioneve që kreu UDB-a nëpërmjet Riza Salihut, ajo
angazhoi spiunë të tjerë për të futur huti e dyshime në radhët tona të
organizuara. Gjatë vitit 1980, nga organizimet e “majta” vepronin vetëm dy
subjekte: Fronti i Kuq Popullor dhe Grupi Komunist Zëri i Kosovës (i shpërndarë
në nëntor të vitit 1980), ndërsa si subjekt i “djathtë” ishte Besëlidhja
Shqiptare. Pra, nuk ekzistonin shumë grupe staliniste, kriminale, siç
dezinformoi Jusuf Buxhovi.
Gjatë verës së vitit 1980 angazhohen kryesisht Xhevat Ramabaja
(Kamenicë, prezantohej si “Xhavit”), Besim Rexha (Gjakovë, prezantohej si
“Shpati”), Nuhi Sylejmani (Kumanovë) etj. Ata përpiqeshin ta bindnin Jusuf
Gërvallën se unë bashkëpunoj me “reaksionin” kroat, se nga ai kam marr ndihma
financiare për të blerë armë për luftën çlirimtare në Kosovë, por që i kam
investuar për të ndërtuar hotel “Kalanë” në Zahaq (duke e kamufluar si objekt
të dajës) etj. Në fakt, unë kisha huazuar nga zotëri Knezoviq (vëllai i Vinkos,
koleg studimesh, ish-udhëheqës i Lëvizjes Studentore në Zagreb në vitin 1971)
50 mijë DM (25 mijë euro), meqë na kishte mashtruar Hysen Muhaxheri (Ferizaj),
të cilin e kishte dërguar Elektroekonomia e Kosovës në studime postdiplomike në
Gjermani. Mashtrimi perfid i Hysen Muhaxherit ishte: i duheshin 50 mijë DM si
kaucion për eksperimente laboratorike në Universitetin e Duisburgut. Rezultoi
se Hyseni nuk na mashtroi vetëm mua, kroatin Knezeviq, por edhe disa farefise
të tij dhe kolegë gjermanë. Rreth 300 mijë DM u identifikuan se i kishte “huazuar”
gjithandej, por i kishte humbur në bixhoz. Këtë të vërtetë të hidhur e dinte
Besim Rexha nëpërmjet Vinko Knezeviq.
Për Xhevatin e Nuhiun kisha filluar të dyshoja se janë bashkëpunëtorë të
UDB-së. Xhevati ishte anëtar i Partisë Komuniste Gjermane (marksiste-leniniste),
kishte marrë pjesë bashkë me Besimin dhe Idriz Bajrën (Istog) në themelim të
Frontit të Kuq Popullor (FKP) në verë të vitit 1978. Sjelljet e Xhevatit
ngjanin në sjellje UDB-ashi, sjelljet e Besimit i ngjanin dogmatit maniak
(prezantohej si anëtar i KQ të PPSH-së). Ato na shtynë që formën organizative
të FKP-së ta ndryshonim, ndërsa Xhevatin dhe Besimin i dezinformuam se Fronti
nuk ekzistonte më. Nuhiut i frikësoheshin si spiunë shqiptarët e punësuar në
fabrikë të Mercedesit (Siendelfingen), meqë jetonin bashkë në konvikte të
fabrikës. Këta dhe të tjerë e dezinformonin Jusufin edhe për sabotim nga ana
ime të shpërndarjes së revistës “Lajmëtari i Lirisë”.
Kjo dhe ndonjë diversion tjetër bënë që Jusufi të hidhërohej
shkurtimisht ndaj meje, por shumë shpejt u sqaruam. Edhe në vitet e pastajmë ai
hidhërim kalimtar i Jusufit u shpërdorua, sikur Jusufi më paskësh përzënë nga
shtëpia, sikur ai ka dyshuar ndaj meje, sikur nuk ishim bashkëveprimtarë etj.
Edhe këta individë kanë njerëz që i admirojnë, prandaj është e dëmshme
që tani të ndodhin konfrontime.
Konfliktualitetet e Sabri Novosellës, Avdullah Prapashticës, Xhafer
Shatrit
Gjatë verës së vitit 1981 nga Kadri Zeka na ofrohen për bisedime “Tezat
e Frontit për Republikën e Kosovës”, të përpiluara nga OMLK-ja. Ato u ofruan
për të biseduar për bashkim të tri subjekteve të organizuara. I miratuam me
modifikime të vogla. Me kërkesë të Jusufit, që veterani Sabri Novosella ta bëjë
publike bashkimin, takohen në Stamboll Kadri Zeka e Bardhosh Gërvalla me Sabri
Novosellën, në tetor të vitit 1981. Sabriu e pret keq Kadriun dhe bashkimi
dështon. Sabriu e komandon Jusufin ta ndërpresë bashkëpunimin me Kadriun. Pason
një ftohje, shpejt kalimtare, e marrëdhënieve mes Jusufit e Kadriut. Festimin e
28 Nëntorit 1981 e organizojmë bashkërisht në Esslingen. Jusufi e Kadriu
bashkërisht dalin në podium për të mbajtur fjalime e për t’iu përgjigjur
pyetjeve të bashkatdhetarëve.
Se si dhe nëpërmjet kujt e ka anëtarësuar Sabriu në LNÇKVSHJ Jusufin për
mua ende ka ngelur e pasqaruar.
Në fund të vitit 1979 duhet të jetë simuluar arratisja e “udhëheqësit”
Sabri Novosella në Shqipëri. Rezulton se transportimin e tij nga Prishtina deri
buzë kufiri e ka bërë ish-shefi i UDB-së së Prishtinës, Ibush Kllokoçi. Prej
andej Sigurimi organizon vendosjen e tij në Turqi. Deri në fund të gushtit ai
fare nuk e kontakton Jusufin (qoftë vetëm nëpërmjet telefoni ose në ndonjë
formë tjetër). Tek pasi shteti shqiptar duhet t’i jetë përgjigjur lutjes së
Jusufit për ndihmë financiare, të cilat i dorëzohen Sabriut në Turqi (bëhet
fjalë për miliona USD), Sabriu e kontakton Jusufin (të cilit ia përcjellë vetëm
10 mijë USD, aq sa kishte kërkuar Jusufi për të blerë makinë faqosëse për
tekste).
Pas konfliktit të tetorit mes Sabriut e Kadriut rrjeti i spiunëve është
mobilizuar për ta dezinformuar Jusufin për sabotazhët që gjoja po ia bënte
Kadriu. Sërish shquhen Nuhi Sulejmani, Xhevat Ramabaja dhe të tjerë (më pak të
zellshëm). Në atë situatë Sabriu duhet ta ketë urdhëruar Jusufin për ta botuar
“Zërin e Kosovës” (si organ të LNÇKVSHJ) dhe ta fillojë anëtarësimin e
bashkatdhetarëve në atë organizatë. I boton dy numra, në të parin shkruan për
“mashtrimet” që i paskësh bërë Kadriu, pa ia përmendur emrin.
Në dasmën e Kadriut me Saime Jusufin (02.01.1982) ndodh sqarimi mes
Jusufit e Kadriut për ta vazhduar bashkëveprimtarinë. Më 16 janar 1982, me
ftesë të Jusufit, ndodh takimi në afërsi të Shtutgartit. Pas mesnate, me
kërkesë të Jusufit, shkojmë në shtëpi të vëllezërve Gërvalla. Tashmë UDB-a
duhet të jetë informuar se bashkimi do të ndodhte, prandaj ka urdhëruar
vrasësit të zënë pritë. Dikush nga rreth 15 pjesëmarrës në takim duhet të ketë
informuar për shkuarjen tonë te vëllezërit Gërvalla.
Në mëngjesin e 17 janarit 1982 merret vendimi për Bashkim të tri
organizatave në Lëvizje.
Vrasja e Jusufit, Kadriut e Bardhoshit ka ndodhur rreth orës 22.15, më
17 janar 1982. Informatorët e lëvizjeve të fundit fizike, siç u është ngushtuar
rrethi, do të identifikohen. Atyre është duke ua sheshuar arsyetimin dorasi i
dyshuar Riza Salihu, i cili në televizion dhe gazeta në Kosovë u përpoq t’i
diskreditonte Jusufin e Bardhoshin si bashkëpunëtorë të UDB-së, ndërsa Kadriun
si viktimë. Çuditërisht pakkush reagoi kundër shpifjeve të tij diskredituese.
Më 17 shkurt 1982 takohen në Turqi Sabri Novosella dhe Avdullah
Prapashtica. I pari i shoqëruar nga Xhafer Durmishi, i dyti ndoshta nga Faton
Topalli. Avdullahu ishte oficer legal i UDB-së. Si u njohën e kush i kontaktoi
nuk kam mundur të informohem. Ata u bashkuan në “Lëvizjen për një Republikë
Shqiptare në Jugosllavi”, ose në “Lëvizjen për një Republikë Socialiste
Shqiptare në Jugosllavi”. Në prill u “arratis” nga burgu i Prishtinës Xhafer
Shatri. Ai, “në emër” të OMLK-së, më 5 maj 1982 vendosi t’i bashkohej kreaturës
së 17 shkurtit. Menjëherë filluan “zënkat” mes këtyre “përfaqësuesve” të
“bashkimeve”.
Derisa ata largohen nga Lëvizja, angazhim kryesor në Lëvizje kishim
sqarimin dhe pajtimin e atyre “zënkave”. Pas largimit të tyre Lëvizja ia doli
të pozicionohet në vendimmarrjen e 17 janarit 1982.
E çfarë synimesh të tjera do të duhej të kishte UDB-a, nëse jo t’i
vriste dy udhëheqësit kryesorë, të komplotonte pastaj me “udhëheqës” e
“përfaqësues” (që nuk i kishte autorizuar asnjë organizatë a parti) për të bërë
“bashkime” dhe t’i impononte organizatës të dalë nga ato “bashkime” që të
kishin preokupim kryesor “zënkat” mes tyre, me synim kryesor degjenerimin dhe
kontrollimin e organizimit të deriatëhershëm nga UDB-a!?
Të gjithë këta individë kanë rreth të gjerë njerëzish që i admirojnë,
prandaj është e dëmshme që tani të ndodhin konfrontime.
Komploti i “Avni Rrustemit” (Musa Hotit) në Bruksel
Më 4 gusht 1981 Musa Hoti, në Bruksel, rreth orës tre të mëngjesit, në
një lokal të afirmuar si striptizbar (i quajtur “Whai Horst” / “Kali i
bardhë”), vret një “shofer” nga Bosnja (sigurisht kuadër i UDB-së), i punësuar
në Ambasadën e Jugosllavisë në Bruksel. Prej aty arratiset dhe strehohet në
shtëpi të Rifat Kolgjinit, një si rezidencë e dytë e ambasadorit jugosllav në
Bruksel. Në atë moment Musa ishte i shoqëruar me “gërrbën” (një monstrum vërtet
gërrban nga Vushtrria, ku i kishte dalë fama e keqe si poreznik dhe informator
i UDB-së, por pas komprometimit ishte “arratisur” në Belgjikë). Flitej se zënka
mes Musës dhe të vrarit kishte ndodhur për shkaqe private, meqë ata së bashku
duhet të kenë shitur pasaporta e dokumente të falsifikuara jugosllave për t’i
ndihmuar shqiptarët që “arratiseshin” dhe të kërkonin azil politik në Belgjikë
(?).
Kështu më informuan Hysen (Xhelil) Kalishta, i cili pat ardhur në
Gjermani, i shoqëruar nga dhëndëri i tij, për të kërkuar angazhimin tim t’i
sigurohej Musës një pasaportë shqiptare që të arratisej në Shqipëri. Insistonin
të më merrnin me vete, të shkonim menjëherë në Ambasadën Shqiptare në Paris,
atje të kërkonim pasaportë për Musën. Sapo dëgjova rrëfimet u përgjigja
shkoqur: “E para, nëse do të shkojmë për këtë punë në atë Ambasadë, do të na
diskualifikojnë për provokatorë. E dyta, edhe po të pranonin kërkesën tonë, nuk
ia vlen të angazhohemi për atë kriminel, akti i të cilit komprometon
emigracionin tonë si emigracion kriminal. E treta, Musës nuk i kihet besë, meqë
edhe po të pranonte Ambasada t’i lëshonte pasaportë false, ai vetë do të
ekspozohej te policia në ndonjë aeroport se po arratisej më ndihmë të
diplomatëve shqiptarë, për t’iu akuzuar pastaj shteti shqiptar se po ndihmon
kriminelët e Kosovës”.
Por ajo vrasje shpejt u shndërrua nga rrjeti i UDB-së dhe injorantët në
heroizëm, në një si atentat politik, i ngjashëm me atentatin e Avni Rrustemit
ndaj tradhtarit serbofil Esat Toptani në Paris. Aty e tutje në emigracion Musa
quhej “Avni Rrustemi”.
Cili kishte qenë Musa Hoti deri atëherë!? Së fundi, para “arratisjes” në
vitin 1978, përflitej si shitës i diplomave të falsifikuara të Shkollës Normale
në Mitrovicë. Në fund të marsit 1981, në tubimin e organizuar nga Ambasada
Jugosllave në klubin jugosllav “Përparimi”, për t’i dënuar demonstratat në
Prishtinë, ky farë “Avni Rrustemi” kishte treguar patriotizmin e tij jugosllav
në mënyrë më skandaloze.
Në atë tubim disa patriotë shqiptarë, me shtetësi turke, kundërshtojnë miratimin e telegramit për t’i dënuar demonstratat. Musa nxjerr revolen, zbraz disa fishekë, duke ulëritur: “Kush guxon me e kundërshtu Jugosllavinë e shokut Tito kam me i dhanë plumb në ballë...”. Shqiptarët që kishin kundërshtuar e lëshojnë mbledhjen. Megjithatë, telegrami dënues në emër të klubit “Përparimi” publikohet në mbrëmje në mediet jugosllave.
Në atë tubim disa patriotë shqiptarë, me shtetësi turke, kundërshtojnë miratimin e telegramit për t’i dënuar demonstratat. Musa nxjerr revolen, zbraz disa fishekë, duke ulëritur: “Kush guxon me e kundërshtu Jugosllavinë e shokut Tito kam me i dhanë plumb në ballë...”. Shqiptarët që kishin kundërshtuar e lëshojnë mbledhjen. Megjithatë, telegrami dënues në emër të klubit “Përparimi” publikohet në mbrëmje në mediet jugosllave.
Në maj të vitit 1982 ishte paralajmëruar procesi gjyqësor. Vërshonin
telegramet e injorantëve për ta kërkuar pafajësinë e Musa Hotit. Edhe Kryesia e
Lëvizjes në mbledhjen e parë të saj konstituive, po në maj të 1982-s, me
insistim të Xhafer Shatrit, provon ta imponojë vendimin që t’i angazhonte
anëtarët dhe simpatizantët e saj të dërgojnë telegrame. Kundërshtova me
arsyetim se nuk duhet ta inkriminojmë Lëvizjen. Ndodhi zënkë goxha e rëndë mes
meje e Xhaferit. Megjithatë, vendimi nuk u mor, por Xhaferi organizonte dërgim
të telegrameve, kurse unë sqaroja anëtarët dhe bashkatdhetarët të mos dërgonin.
Për t’i ikur shërrnajës me Xhafer Shatrin dhe për shkak se me kishte
ftuar bashkëveprimtari Gjeto Sinishtaj (nga Rrethi i Tuzit), vendosa të shkoj
në SHBA. Nga fundi i qershorit 1982 arrita atje. Në një pritje që organizuan
malësorët e Rrethit të Tuzit, në banesë të Ndue Camajt, po më rrëfenin me
krenari për aksionin e grumbullimit të ndihmave financiare për Musa Hotin. Pa
ndonjë takt, u thash brutalisht: “Ma mirë ato ndihma shkërdheni vetë me kurva
këtu sesa t’ia dërgoni vëllait të Musës, Isa Hotit, që t’i harxhojë në bixhoz e
kurvëri...”. Plasi debati. Njëri nga të pranishmit nxori një kopje të letrës,
të cilën Sabri Novosella ia kishte dërguar në burg Musa Hotit. Ajo përmbante
njoftimin se Musa Hoti ishte kooptuar në kryesi të Lëvizjes për shkak të
meritës patriotike që kishte vrarë ambasadorin jugosllav. Kopjen e asaj letre
në Amerikë e kishte dërguar nga burgu Musa Hoti, duke bërë shënim me dorë
poshtë saj që të organizoheshin në celula treshe, ilegale, në kuadër të
Lëvizjes. U zura ngushtë. Zura të sqaroj: “E para, Musa Hoti nuk ka varë
ambasador, por një shofer ambasade, me të cilin shisnin pasaporta e dokumente
jugosllave dhe e ka vrarë në një bordel në ora tre të mëngjesit, ku deri
atëherë duhet të kenë pirë bashkë. E dyta, Sabri Novosella nuk ka të drejtë ta
kooptojë Musën, sepse në kryesi janë nga dy veta prej tre organizatave të
mëparshme dhe unë i shtati, si përfaqësues i Frontit të Kuq Popullor. E treta,
Musa Hoti nuk mund të kooptohet në Kryesi, sepse e komprometon Lëvizjen si
organizatë kriminale. E katërta, Lëvizja në Perëndim nuk organizohet në celula
treshe dhe as ilegalisht, por në këshilla popullore, pa përkufizim të
anëtarëve. E pesta, tani Musës i është mundësuar të këmbejë letra me
mërgimtarë, t’u japë urdhra për organizim dhe veprimtari dhe të kërkojë prej
tyre informacion dhe gjithë atë letërkëmbim e kontrollojnë policia belge dhe
jugosllave...”. Përfundimisht, pas debatit të gjatë, u vendos të ndërpritej ai
aksion.
Në vitin 1984 Sabri Novosella largohet nga Lëvizja me 4-5 veta, nisi
veprimtarinë në Suedi, nxori dy numra të një fletushke po me emrin “Zëri i
Kosovës” dhe shumë shpejt pushoi veprimtarinë. Bile një kohë zuri të simulonte
një krizë shpirtërore, sa të prezantohej se ishte anëtarësuar në sektin
Dëshmitarët e Jehovas. Prapa i shkon edhe Musa Hoti.
Nga gjyqi i shkallës së parë Musa Hoti duhet të jetë dënuar me burg të
përjetshëm. Pa u mbush tre vjet burg lirohet. Banesa e tij qe shndërrua në një
lloj “meke” për mërgimtarët që shkonin për ta vizituar, uruar e madhëruar.
Kishin vendosur të shkonin edhe disa anëtarë të Lëvizjes në Bruksel. Shkova për
t’i shoqëruar e sqaruar. Paraprakisht i informova se mund të plaste debati që
do të eskalonte në sherrnajë. Hysen Xhelili mori revolen me vete për çdo
eventualitet rrezikshmërie. Shkuam shtatë-tetë veta. Në bisedë e sipër iu
drejtova Musa Hotit: “Mund të na informosh, me cilin vendim gjyqësor je liruar
nga burgu?” Ai u përgjigj: “Me vendim të Gjykatës së Strasburgut”. Ia ktheva:
“Po gënjen, Gjykata e Strasburgut nuk shqyrton lëndë të tilla. Urdhëro, dëshmo,
jemi këtu, trego vendimin e cilësdo gjykatë që ta lexojmë e të bindemi. Po pate
të tillë vendim që të ka liruar nga vuajtja e dënimit, ke gjithë këta burra
këtu, unë po e paguaj plumbin dhe më vrisni si dënim për shpifje. Përndryshe ta
kesh për turp, sepse ti duhet të jesh liruar me kërkesë të Ministrisë së
Brendshme të Jugosllavisë, me arsyetim se ka ndodhur vrasje në rrethana
afektive në mes kolegësh, se ti u duhesh në liri për ta luftuar krimin e
organizuar të nacionalistëve ekstremistë e terroristë shqiptarë!” Ai u nxiros.
Disa i folën ta tregonte vendimin dhe të më vrisnin si qen. Pritëm pak qaste
nëse po lëvizte. Ai u shpërfytyrua në mumje. Hysen Xheli, si më i moshuar,
foli: “Shkojmë burra, se na mbulon marrja po vazhduam të rrimë me këtu!” U
ngritën pothuajse të gjithë.
Në një rast, ndoshta pasi kishim varrosur Enver Hadrin, ishim ulur në
hollin e hotelit “Sheraton” bashkë me Josef Dio Gardin. Ishte edhe Hysen Gërvalla
aty. Musa po priste në këmbë, tre-katër metra larg. Dio Gardi kërkoi falje se
duhej të shkonte ta vizitonte Musa Hotin në shtëpi, për ta nderuar për aktin
patriotik. E luta të mos shkonte, sepse do të komprometohej, me arsyetim se ai
nuk ka bërë akt patriotik, por kriminal. Ai u falënderua, u ul sërish.
Në dy-tre vjetët e fundit të jetës Musa u shpërfytyrua në një pijanec
dhe në njeri skajshmërish i dëshpëruar. Natën e vdekjes këmbët nuk e bartnin
dot nga pirja, që të shkonte në shtëpi. E dërgon me makinë Sabit Abazi (Zhegër,
Gjilan).
I kam përcjell paksa krrokamatë e Reshat Sahitajt për Musa Hotin, për
vete, për Enver Hadrin dhe ndonjë tjetër. Uroj të ndërgjegjësohet për të
pushuar së prezantuari të mive për elefantë.
Tashmë dihet se Musa është varrosur me ceremoni ushtarake në Varrezat e
Dëshmorëve në Prishtinë. Mjerisht, ka kërkesa edhe nga Shoqata e Veteranëve...
që presidentja Jahjaga ta shpallë Musa Hotin hero.
Duke pasur parasysh se Musa Hoti ka ithtarë të mashtruar e të spekuluar
(eh, fatkeqësisht kemi shumë injorantë të lajthitur), është e dëmshme që tani
të ndodhin konfrontime.
Përballja me diversantin e UDB-së Haki Tërpezën
Në prag të nisjes për Nju Jork, në Aeroportin e Brukselit, më rastisi të
njihem me një politologe shqiptaro-amerikane. Ajo po kthehej nga Parisi, ku
kishte mbaruar studimet postdiplomike, dhe po vazhdonte për në Nju Jork. Gjatë
gjithë fluturimit biseduam për emigracionin në SHBA. E njihte mirë edhe për
shkak se ishte vajza e redaktorit të gazetës “Dielli”. Vlerësimet e saj ishin
më shumë sesa dëshpëruese.
Vizita e parë ishte te kushërinjtë e familjes së Binak (Avdia) Bruçaj.
Pleqnari Binak, pas disa orëve, me keqardhje tepër njerëzore më tha: “Jam shumë
i gëzuar për ardhjen tane, por më ke zanë ngushtë. Nuk të bëjmë dot konak këtu,
sepse do të spiunohemi dhe do ta vuaj Shabani në Prishtinë (djali i Binakut,
punonte në administratën e Kuvendit të KSA të Kosovës). Do të gjejmë hotel dhe
do ta paguajmë për sa kohë që do të jesh për vizitë. Por, ruaju djali i mixhës,
se këtu ka shumë udbash”. Ndërhyri djali i tij më i moshuari, Alia: “Babë, mos
e mbaj këtë gajle, do të vendoset te dhëndëri Ahmet Zherka”.
Familja e Ahmet Zherkësh ishte arratisur në Kosovë nga Bytyçi i Tropojës
pas LDB. Ahmeti kishte mbaruar shkollën normale në Ferizaj (siç quhej atëherë
shkolla e mesme, që kualifikonte mësuesit). Në Nju Jork ishte afirmuar si
patriot trim, meqë i kishte ndodhur fatkeqësia që e kishte afirmuar. Ai kishte
vrarë punëdhënësin e tij ruso-amerikan. Shkak kishte qenë vizita që i kishte
bërë ai Ahmetit në zyrë të punës. Me atë rast punëdhënësi ruso-amerikan ia
kishte grisur flamurin kombëtar shqiptar, të cilin Ahmeti e mbante mbi tavolinë
të punës. Flamurin e kishte sharë mbi baza nacionaliste e shoviniste. I
ofenduar rëndë, Ahmeti e vret. Dënimi kishte qenë i butë për shkak të motivit e
rrethanave të vrasjes.
Gjatë ditëve të para ai më informon për emigracionin shqiptar, politik e
ekonomik, në SHBA, duke shprehur keqardhje se në përmasa të mëdha dirigjohet e
kontrollohet nga UDB-a.
Pas 4-5 ditësh ai me shqetësim më drejtohet: “Mik, me keqardhje të
informoj se është përhap fjala që të ka komanduar UDB-a dhe Sigurimi për të
spiunuar e përçarë emigracionin këtu. Ndër me aktivët në këtë propagandë është
Haki Tërpeza”. E luta të më krijonte mundësinë për ballafaqim me të. Të
nesërmen ndodhi ballafaqimi në lokalin e një “bosniaku” nga Plava, i cili
shquhej për patriot shqiptar.
Sapo u ulëm në tavolinë me Haki Tërpezën, Ahmeti thotë me ironi: “Ja, ta
solla spiunin e UDB-së dhe të Sigurimit, ky është Ibrahim Kelmendi”. Pa u
vonuar, i drejtova pyetje nga ishte informuar aq shpejt për shkuarjen time në
Amerikë. Ai me krekosje u përgjigj: “Edhe ne kemi njerëzit tanë që na
informojnë”. Ndërhyra, duke i thënë se mundësi reale të spiunimit ishin Xhafer Shatri
ose Xhafer Durmishi, meqë ata e dinin. Ai u zgërdhi, si fitimtar: “Ju
kuçaloshët e Enverit nuk na trembni, unë ia kam q... e do t’ia q... prapë nënën
Shqipërisë si diversant trim...”. “I dërguar nga UDB-a”, e ndërpreva unë. “Edhe
nga CIA-n”, shtoi ai. “Guxo e përsërite edhe një herë të njëjtën sharje ndaj
Shqipërisë”, iu drejtova kërcënueshëm. Ai e përsëriti. Ia vura revolen në
ballë: “Kërko falje pleh i UDB-së, se t’i derdha trutë në dysheme!” Zuri të
ulërijë përgjërueshëm: “Në dorë tanën e t’Allahut, ma fal jetën...!” Luta një
djalë të rritur, që ishte në tavolinën pranë: “Nxjerre zvarrë jashtë këtë
ndyrësirë!” Ai mezi kishte pritur dhe e tërhoqi zvarrë deri jashtë. Të tjerët
aplauduan. Njëri nga të rinjtë bërtiti: “Ja, të tillë UDB-ash na paskan frikësuar
kot deri tani që të mos angazhohemi më shumë për Kosovën”.
Edhe Haki Tërpeza ka ithtarë të tij, të cilët e vlerësojnë atë si
“nacionalist”, “çlirimtar”, “demokrat”, prandaj nuk kemi ndonjë dobi nga
konfrontimet.
Hysen Tërpeza, alias “Bruklini”
Pas dy-tre javësh të qëndrimit në Nju Jork kushëriri Ali (Binak) Bruçaj
më lut ta takoj një mik të tij. Ai ishte Ismet Berisha, pinjoll i familjes së
luftëtarit e pleqnarit Sadik Rama i Gjurgjevikut (rrethi i Rahovecit). Takimi
ndodhi në shtëpi të familjes Bruçaj. Pas njohjes Ismeti më luti ta ndihmoja për
ta përgatitur fjalimin për kongres që do të mbante Lidhja e Dytë e Prizrenit.
Informoi se konkurrent për t’u zgjedhur kryetar e kishte Hysen Tërpezën, për të
cilin shprehi dyshimin se ishte njeri i UDB-së. Bile më ofroi një kostum të ri
si honorar.
Për prapësi të shumta të Hysen Tërpezës më kishin informuar gjerë e
gjatë Gjelë e Hysen Kalishti, meqë bashkë kishin qëndruar gjatë kohë në kampe
të refugjatëve në Greqi. Ata ofronin një mori argumentesh për angazhimin e tij
për UDB-në, e cila nuk e kishte të vështirë t’i shantazhonte individë të tillë
për t’i përvetësuar si bashkëpunëtorë. Mjaftonte t’u përgatiste dosje me akuzë
se kanë qenë kolaboracionist kriminelë të nazifashizmit, që të ekstradoheshin
në Jugosllavi për t’u gjykuar. Për këto nuk i fola fare Ismet Berishës.
Në vitin 2004 bisedova me Shefqet Hashanin, meqë kishim caktuar takim
për të bërë intervistë. Fillimisht u përcaktova të bëjmë bashkëbisedim pa ia
treguar magnetofonin (digjital). Po incizoja fshehurazi. Në bisedë e sipër ai
tha se e kishte habitur Mustafë Xhemaili (Komogllavë, Ferizaj) që kishte
shkruar monografi voluminoze afirmative për Haki Tërpezën, duke e prezantuar si
patriot të shquar. Ai rrëfeu: “Duke qenë drejtor i drejtorisë së 5-të të UDB-së
së KSA të Kosovës, e cila mbikëqyrte emigracionin, isha për disa muaj në
Amerikë. Atje rirekrutova Hysen Tërpezën dhe ia vura nofkën ‘Bruklin’. I dhashë
për detyrë të më informonte për veprimtari të emigracionit dhe të nxiste
përçarje e huti. Duke më ardhur keq për të, organizova një takim të tij me
gruan e djalin, të cilët nuk i kishte parë nga LDB-ja. Rezervova për ta hotel
në Stamboll, ia rezervova Hysenit biletën Nju Jork - Stamboll. Për t’u dukur
udhëtim familjar i gruas dhe djalit të tij nga Kosova, mora një mik timin,
arsimtar në Ferizaj, i cili duhej të na shoqëronte me makinë të tij, duke pasur
gruan e tij me vete dhe gruan e djalin e Hysenit. Kurse unë dhe gruaja ime i
përcillnim me makinën time. Ndenjëm në Stamboll një javë. Verave të tjera
Hysenit ia paguaja biletën që të vinte në Kosovë, në vilat e UDB-së në
Brezovicë të rrinte me gruan e djalin, sepse në Stamboll na kushtonte
shtrenjtë” (perifrazim i lirë).
Sigurisht, edhe Hysen T`rpeza ka shumë ithtarë që e çmojnë lart për
“patriot të shquar nacionalist”, prandaj nuk ia vlen të kemi tani konfrontime.
Kongresi i VATRËS...
Në korrik të 1982-s nëpërmjet adresës së bashkëveprimtarit Gjergj Kalaj
(rrethi i Tuzit) më vjen letër nga Xhafer Shatri. Njoftohem se duhet të marr
pjesë në kongresin e Vatrës, si mysafir, ku duhej të përshëndesja në emër të
Lëvizjes. Xhaferi ma kishte dërguar edhe tekstin e fjalës përshëndetëse. Marrë
me vete katër malësorë (të rrethit të Tuzit). Kur u hap kongresi më prezantuan.
Sapo zu të zgjidhej kryesia e punës, filluan me fjalime vetëlavdëruese ata që
donin të imponoheshin për të qenë anëtarë të kryesisë. Ishin kryesisht kuadro
të legalitetit, të cilët garonin mes tyre, kush i kishte lidhjet më të ngushta
e më të freskëta me Beogradin. Pasi përfundoi zgjedhja e kryesisë me thirrën ta
përshëndesja kongresin. Shkova në foltore, nxora nga xhepi tekstin e fjalës, ua
tregova të pranishëmve dhe iu drejtova: “Këtu kam tekstin e fjalës
përshëndetëse, por nuk do ta paraqes, sepse ndihem i turpëruar që ndodhem në
këtë, i thënçin kongres. Me vjen keq shumë për Vatrën e Nolit dhe të Konicës që
paska rënë në duar të UDB-ashëve. Ta keni për turp këtë tradhti!”
Zbrita nga podiumi në drejtim për të dal jashtë. Bashkëveprimtarët u
ngritën gjithashtu. Mbi gjysma e të pranishëmve, vatranë të vjetër, duke
aplauduar, lëshuan kongresin. Kongresi u prish.
Ditët në vijim u përfola goxha shumë. Ca shpifnin se më kishte dërguar
Sigurimi, ca UDB-a për ta përçarë Vatrën. Në mbrëmje më telefonoi Xhaferi, duke
më kritikuar e kërcënuar për atë skandal.
Edhe ata individë kanë përplot ithtarë, prandaj nuk ia vlen të kemi tani
konfrontime.
Skandal primitiv në Ambasadën Shqiptare pranë OKB-së
Ndërkohë kushëriri Qerim (Binak) Bruçaj më lut t’i bëjmë një vizitë
Ambasadës Shqiptare në Nju Jork pasi, siç më tha, ia kishte shprehur hidhërimin
ambasadori Abdi Baleta, përse nuk isha shkuar deri atëherë.
Shkuam. Abdiu na ofroi një pritje të përzemërt. Në bisedë e sipër hynë
një sigurims i shpifur. E njoha. Me të kisha pasur një zënkë të ashpër në
Ambasadën Shqiptare në Vjenë në fillim të prillit 1981. Ai hyri në një dhomë tjetër.
Pas pak nxori kokën: “Shoku ambasador, keni një telefonatë”. Ambasadori kërkoi
falje, duke thënë se do të kthehej sapo ta përfundonte telefonatën. U vonua ca.
Kur u kthye, na u drejtua: “Duhet t’i lironi ambientet e ambasadës, nuk kam
qenë i informuar se ti (duke m’u drejtuar mua) je një anarkist i
papërmirësueshëm...!” “E di çka, ndërhyra unë, kjo Ambasadë nuk është shtëpi
private as e Juaja dhe as e atij sigurimsi të shpifur, prandaj ne nuk dalim!”
Abdia, i habitur, u largua në zyrë tjetër, unë e Qerimi ngelëm aty. Qerimi po
më luste të dilnim. Për inate ndejmë goxha një copë herë.
Edhe këta individë kanë ithtarë të tyre, prandaj nuk ia vlen të kemi
tani konfrontime.
Takimi ekcesiv me UDB-ashin Zef Camaj
Po në korrik 1982 bashkëveprimtari Nue Camaj më lut t’i bënim një vizitë
kushëririt të tij, Zef Camaj. Arsyetimi i tij ishte që atë sapo e kishte
dërguar UDB-a e Malit të Zi për t’i përçarë malësorët. Këmbëngulte ta vizitonim
bashkë, ta bindnim të dezertonte, përndryshe, përbetohej, do të detyrohej ta
vriste, sepse po turpëronte fisin e Dedë Gjo Lulit. Pranova. Ai mori revolen me
vete.
Zefi dhe e shoqja na mirëpriten bujarisht. Nua ia paraqiti Zefit arsyen
e vizitës sonë. Në bisedë e sipër shpërtheu gruaja e Zefit, një copë
injoranteje: “Po ti kunati Nue, ç’t’keqe ke prej UDB-së. Për Zotin, ma ka
nxjerr biletën e aeroplanit, më ka marrë me makinë në Tuz vetë kryeshefi i
UDB-së së Titogradit dhe bashkë kemi udhëtuar deri në Beograd. Më ka përcjell
bile deri në derë të avionit...”. Ndërhyri Nua: “Po, kunatë, po, he mozomakeq
për ne, por ama sa herë të ka q... gjatë rruge?!” Pastaj iu drejtua Zefit: “E
sheh, nuk e fsheh dot...”. Zefi ulëriti: “Po më prek në moral familjar!” Nua
nxori revolen, ia drejtoi duke i thënë: “Po çfarë morali ka shqiptari që bëhet
argat i shkjaut, he...”. I kërceva në dorë, ia mora revolen, u larguam që aty
tepër të mllefosur, duke u betuar Nua se do ta vriste. I fola shumë, se vrasje
nuk duhet të na ndodhnin në emigracion.
Të njëjtin Zef Camaj e takova në janar të vitit 1991 në Tiranë. Ai përditë e frekuentonte hotelin “Dajti”. Shpesh e
kalonin kohën aty me Preç Zogajn. Një ditë nuk u përmbajta, u ula në tavolinë
të tyre, meqë për Preçin kisha respekt: “Preç, - iu drejtova, - sot e tutje ta
kesh të ditur, nuk po rri me Zef Camen si patriot i Malësisë së Madhe, por me
Zef Camën si kuadër madhor i UDB-së”.
Po këtë Zefë Camajn më
rastisi ta shoh në takim me kryeshefin operativ të Shërbimit Informativ të
Shqipërisë, Bujar Hoxha, në fund të dhjetorit 1996. Vetëm ata dy ishin ulur në
një kthinë të thellë të restorantit përballë hotel “Dajtit”. Zefin e njihja,
bashkëbiseduesin jo. E pyeta kamerierin. Më tregoi. Ikim që aty pa ngrënë, meqë
po mendonim se do të më shihte Zefi dhe do të hakmerrej. Isha shkuar atje më
vëllanë tim, Dautin, për ta vizituar e ndihmuar në shërim vëllanë Qerim, i cili
ishte plagosur gjatë sulmit të Stacionit të Policisë në fshatin Çollapek
(Pejë).
Edhe Zef Camaj duhet të
ketë ithtarë që e admirojnë, prandaj nuk na duhen tani konfrontime.
Shërrnaja skandaloze me Molla Isuf Azemin
Në shtator 1982 isha për vizitë disaditore te familja e Kolë Gojçit
(rrethi i Tuzit), që jetonte në afërsi të Detroidit. Një fundjavë vendosëm t’i
vizitonim bashkatdhetarët në rrethinë të Chikagos. Kola bëri bisedë telefonike
me Mentor Lleshin (Dibra e Madhe) dhe po na mirëpritnin. Udhëtuam me makinë.
Arritëm rreth orës 15.00 te Mentori. Aty gjetëm 7-8 bashkatdhetarë. Më vonë u
bënë më shumë.
Vazhduam me biseda e gosti deri pas mesnate. Të nesërmen Mentori e Agim Gashi (nga Prishtina) organizuan një tubim informativ për Kosovën, ku duhej të flisja unë si mysafir. Ishte rezervuar një restorant me sallë të madhe, pronë e një Zajazliu (rrethi i Kërçovës, po më vjen keq që nuk më kujtohet emri i tij).
Vazhduam me biseda e gosti deri pas mesnate. Të nesërmen Mentori e Agim Gashi (nga Prishtina) organizuan një tubim informativ për Kosovën, ku duhej të flisja unë si mysafir. Ishte rezervuar një restorant me sallë të madhe, pronë e një Zajazliu (rrethi i Kërçovës, po më vjen keq që nuk më kujtohet emri i tij).
Në tubim ishte i ftuar edhe Molla Isuf Azemi (i rrethit të Tetovës),
kryetar i Lidhjes Kosovare. Bashkatdhetarët ishin tubuar, por prisnim të vinte
hoxhë Isufi. Ai po vonohej. Ndërkohë njëri nga të pranishmit i telefonoi. Hapi
parlofonin që të dëgjohej biseda e hoxhës. Në pyetjen pse vonohej, hoxha iu
përgjigj: “Nuk vij në atë tubim ku do të flasë UDB-ashi Ibrahim Kelmendi, i
cili ka marrë direktiva të na përçajë”. Në pyetjen, nga e dinte se unë isha
UDB-ash, hoxha u përgjigj: “Në kuran ju baj be se mramë, kur i ra terri tokës,
e kam pa Ibrahim Kelmendin tu hy në ambasadën jugosllave këtu në Chikago”. U
krijua situatë hutie, fare pa shije. Agim Gashi mori fjalën: “Burra, unë,
Mentori, Kolë Gojçi dhe tetë-nëntë burra të tjerë jemi dëshmitarë se mbrëmë
Ibrahim Kelmendi nuk ka dalë fare nga shtëpia e Mentorit. Ai dhe Kola kanë
ardhur rreth orës tre pasmesdite dhe kemi biseduar deri pas mesnate. Të vijnë
dy veta me mua dhe po shkojmë ta marrim hoxhën”.
Pas rreth një ore u kthyen pa hoxhën. Rrëfyen bisedën që kishin pasur
me hoxhën. Skandaloze dhe eksesive.
“Bashkatdhetarë të nderuar e të respektuar, - mora fjalën unë, - ju
lutem të mos shqetësoheni. Edhe hoxha është viktimë e fatkeqësisë sonë
kombëtare, meqë na kanë mundur e pushtuar në mbarim të Luftës së Dytë Botërore.
Aty e tutje UDB-a ka pasur shanset të shantazhojë edhe ata që janë arratisur,
sepse në Marrëveshje të Aleatëve edhe Jugosllavia është njohur bashkëfitimtare.
Asaj i është njohur e drejta për t’i identifikuar e ndjekur ‘kriminelët e
luftës’ në të gjitha shtetet e Aleatëve, siç i kanë quajtur kolaboracionistët e
nazi-fashizmit. Prandaj që nga Xhafer Deva e deri te hoxha këtu ajo i ka
shantazhuar, duke i kërcënuar se po nuk u bënë kuislingë të UDB-së, do të
ekstradohen e dënohen në Jugosllavi. Kjo është fatkeqësi jonë kombëtare dhe na
duhet ta tejkalojmë me urti e mençuri, nuk kemi përfitime nga shpifjet,
konfrontimet mes nesh. Do të vij koha kur ata vetë do të pendohen dhe do të
reflektojnë. Në këtë gjendje duhet të bashkohemi sa më shumë, pavarësisht
bindjeve ideologjike, përkatësive partiake, fetare e krahinore, për Kosovën
Republikë. Sigurisht, duhet të ndodhin angazhime të organizuara larg kontrollit
të personave që kanë sajuar organizime e i udhëheqin ato përjetësisht, pa
lejuar asnjë normë demokraci të brendshme”.
Tubimi kaloi mirë. Fatkeqësisht pas një kohe e kanë vrarë Agim Gashin.
Molla Isuf Azemi, kuislingu nazifashist Xhafer Deva dhe të tjerë, dhe
njerëzit që u shkonin prapa, kanë ithtarë që ende i çmojnë, prandaj
konfrontimet tani janë të dëmshme, na harxhojnë energji që na duhet për të
tanishmen dhe të ardhmen. Rrjedhat që kanë ndodhur në të kaluarën nuk riparohen
dot.
Manifestimi i 28 nëntorit i shoqëruar me krime
Anëtarët dhe simpatizantët e Lëvizjes u mobilizuan të organizojnë
manifestim të madh, me moto Kosova Republikë. Zunë një sallë të madhe me 900
ulëse në periferi të Nju Jorkut. Shoqëritë folklorike të malësorëve nga Mali i
Zi u mobilizuan të shfaqnin spektakël. Gjithandej përhapej fantazma kërcënuese
nga kasnecët jeniçerë të UDB-së. Bashkatdhetarët tashmë nuk i merrnin për
serioze kërcënimet, sepse disa krerëve të emigracionit politik kishin zënë t’u
binin puplat.
UDB-ashi Osman Gashi (nga Ramuni i Pejës), i kamufluar si diplomat, nëse
e kam mbajtur mend nëpërmjet Shaqir Gashit (në restorantin e të cilit kalonte
shumë kohë), kishte pyetur nëse mund të merrte pjesë në manifestim. Disa
bashkëveprimtarë ishin kundër. I bindëm se jo vetëm që mund të merrte pjesë
por, po guxoj, edhe mund ta përshëndeste manifestimin dhe, pse jo, ta shpallte
aty dezertimin nga UDB-a. Përndryshe, përse të mos informonte ai saktësisht për
manifestimin, si një profesionist, por të keqinformonin spiunët injorantë?!
Kujdestarët ishin porosit, nëse do ta shihnin korrespondentin e
“Rilindjes”, Avni Spahiun, të më informonin. Ndërkohë mora vesh se po rrinte në
holl të sallës. Dola ta takoj. Kishim njohje e miqësi nga koha e studimeve në
Prishtinë. U skajuam. E luta të dezertonte, duke i thënë se nuk ishte vetëm
korrespondent i “Rilindjes”, por edhe informator i UDB-së, ashtu si kolegu i
tij në Gjermani, Jusuf Buxhovi. Lutjen time e arsyetova me nevojën që kishim
për kuadër intelektual. Ma ktheu: “Si nuk po mbush mend, më i dobishëm për
Kosovën jam si korrespodent...”. Shkurt, i bie që biseduam për të mos gjetur
mirëkuptim, por nuk u armiqësuam.
Kur dolëm nga manifestimi, që po vlerësohej si tejet i suksesshëm dhe po
u qeshnin fytyrat pjesëmarrësve, u përballem me krim të organizuar: Rreth 35
automjete ishin demoluar rëndë nga kriminelët. Kujdestarët u qortuan pse nuk i
kishin ruajtur gjithë kohën, por u arsyetuan se donin të merrnin pjesë sadopak
në manifestim.
Avni Spahiu, Osman Gashi, bile edhe ata kriminelë ordinerë kanë ithtarë,
prandaj nuk ia vlen tani të kemi konfrontime.
Më 10 dhjetor vendosa të kthehem në Bruksel. Një oficer madhor i FBI-së,
shqiptaro-amerikan, kishte informuar, më duket Gjergj Kalën, se do të kem
probleme kur ta lëshoj Amerikën, sepse ishin deponuar shumë spiunime, se kam
shkuar atje për ti propaganduar komunizmin, enverizmin, se më kishin dërguar
shërbimet jugosllave e shqiptare për ta përçarë emigracionin. Gjergj Kala e
kishte sqaruar, meqë kishin farefisni: “Ai edhe ne enveristëve na ka këshilluar
të mos e përmendim Enverin, por të mobilizohemi vetëm për kërkesën Kosova
Republikë, jashtë çdo politizimi e ideologjizimi”. I njëjti më shoqëroi në
dalje dhe nuk më ndodhi ndonjë pengesë.
Enver Hadri, spiun i UDB-së dhe Sigurimit, në dukje i mjerë e fatkeq
Arsyet përse është arratisur Enver Hadri në Shqipëri dhe përse Sigurimi
i atjeshëm e ka kthyer mbrapa, ende nuk janë ndriçuar, pasi nuk kemi njerëz me
vullnet të mirë dhe studioz që ndriçojnë edhe “personalitete” kontroverse.
Pastaj nuk dimë ende çfarë ka ndodhur kur ato organe ua kanë dorëzuar Enver
Hadrin ushtarëve kufitarë të Jugosllavisë dhe çfarë qëndrimesh ka mbajtur UDB-a
në Pejë për atë arratisje të tij, siç nuk dimë për biografinë e tij të
pastajmë, derisa është “arratisur” në Belgjikë (në vitin 1974). Kishim
(dez)informime se ka mbaruar shkollim profesional të UDB-së diku në ujdhesë
bregdetare kroate, nuk kishte mbaruar studimet e arkitekturës në Beograd (siç
na thoshte).
Bazuar në angazhimet e tij në Belgjikë dhe informatat e mbledhura nga
bashkatdhetarët, na ka rezultuar se ai ka qenë spiun i dyfishtë: i Sigurimit
shqiptar dhe UDB-së jugosllave. Sigurimin duhej ta informonte, mos ndokush po
përgatiste sulme kundër përfaqësive diplomatike shqiptare, kurse për UDB-në,
siç rezulton nga veprimtaria publike, të krijonte “prova”, ta zëmë se
kundërrevolucionarët shqiptarë po përkrahen nga KGB-ja sovjetike (siç na e tha
këto ditë Jusuf Buxhovi) etj.
Veprimtaria e tij e dukshme (e shkruar) është aq e mjerë dhe diletante sa
të vjen keq për gjithë ata të painformuar që ia madhërojnë kot së koti. Nga
veprimtaria e tij publicistike mund të flitet për gjithsej 7-8 shkrime të
botuara në broshurën me titull “Zëri i Kosovës” (shumëzuar me fotokopjues,
format A4, rreth 30 faqe, në dhjetëra ekzemplarë). Ato shkrime kanë nivel të
atillë, sa nxënësi i klasës së parë të shkollës së mesme po ta shkruante, mund
që mësuesi do ta notonte, e shumta me dysh. Përmbajtja e tyre është stereotip i
shkrimeve të emigracionit të vjetër politik, që kritikonin vetëm diktaturën në
Shqipëri, por nuk brengoseshin për pozitë pushtuese të Kosovës. I duhej ta
mashtronte emigracionin politik shqiptar në Belgjikë, se ishte anti-komunist
ekstrem. Në “organizatë” të tij (quhej më duket Rezistenca Shqiptare) e kishte
vetëm një anëtar. E ai ishte Riza Budakova, një ish-zadrugar (shitës), i cili,
për shkak se kishte vjedhur shitoren ku ishte punësuar, ishte “arratisur” në
Bruksel. Ishte një analfabet i
shkret, dukej sikur ishte korrieri ose truproja e Enverit. Edhe për këtë të
shkret me patën (dez)informuar se ishte informator i UDB-së në Ferizaj(?).
Më 4 ose 5 prill 1981
Enveri jep intervistë në Bruksel, ku thotë se Kosova do të bëhet Republikë me
ndihmën e Bashkimit Sovjetik. Më 6 prill 1981 Stane Dollanci mban konferencën e
parë për shtyp për trazirat në Kosovë. Mes të tjerash, ai shpif se në organizim
të kundërrevolucionit në Kosovë ka gisht edhe KGB-ja sovjetike. Kur një gazetar
i huaj e pyet nëse ka argumente, Dollanci ia kthen: “Shihni çfarë ka thënë
nacionalisti shqiptar Enver Hadri, i cili jeton në Bruksel...”. Ishte kjo
koincidencë rastësore?! Pastaj, qe shpifur dhe shpifet, se kishte gisht KGB-ja
në “kundërrevulicionin” e Kosovës.
Në demonstratën që kemi
organizuar më 13 qershor 1981, prania e Enver Hadrit është toleruar, me kusht
që ta ruajnë dy kujdestarë që të mos fliste para kamerave televizive belge,
kurse Hasan Kadria (nga Presheva) është caktuar të japë shpjegime e intervista,
meqë e zotëronte bukur gjuhën frënge.
Xhafer Shatri e angazhon
Enver Hadrin në vitin 1983 për ta formuar Komitetin për mbrojtje të të drejtave
të njeriut, por ai komitet nuk ka mundur të formojë asnjëherë ekip as prej 3
vetave dhe nuk ka bërë ndonjë punë serioze. Enver Hadri ka luajtur rolin, të
them, të korrierit, për t’i shpërndarë në kutitë e parlamentarëve evropianë
materialet që i përgatiste Lëvizja, meqë kishte një dashnore gjermane që ishte
aty e punësuar.
Në vitin 1984 kryesia e
Lëvizjes vendos të organizojë demonstratë në Bruksel dhe për ta paraqitur
demonstratën u vendos të ngarkohej Këshilli i Lëvizjes në Bruksel. Kur ata
shkojnë në polici, informohen se leja është dhënë, meqë e kishte kërkuar Enver
Hadri në emër të një belgu. Shpejt informohemi se Xhafer Shatri i kishte
dërguar letër Enver Hadrit dhe e kishte ngarkuar për ta lajmëruar demonstratën
e Lëvizjes (pa qenë anëtar i Lëvizjes), edhe pse ndryshe ishte vendosur në
Kryesi. Atë komplot e minimizuam si gabim teknik.
Natën e fundit para
mbajtjes së demonstratës takohemi me Enverin në banesë të Reshat Sahitajt, për
të biseduar për finalizimin e organizimit të demonstratës. Aty konstatojmë në
mënyrë skandaloze, se leja për demonstratë ishte lëshuar në emër të një
udhëheqësi të Partisë Komuniste Belge (pro Bashkimit Sovjetik), por Enver Hadri
po përpiqej të na mashtronte me kopje të lejes së falsifikuar, ku në vend të
komunistit belg ishte montuar emri i Enver Hadrit. Biseda u tensionua, meqë
ishim kundër që demonstrata e Lëvizjes të identifikohej zyrtarisht me personin
që i ishte lëshuar leja. Mundësia për ta anuluar demonstratën nuk ekzistonte,
sepse tashmë autobusët me pjesëmarrës të demonstratës ishin nisur nga largësitë
e mëdha. Sigurisht, u bindëm se Enver Hadri po na komplotonte ta implikonte
Lëvizjen si pro sovjetike, edhe pse në broshurat e tij mjerane prezantohej si
anti komunist.
Sapo u miratua rezoluta e
parë nga Parlamentit Evropian, Enver Hadri, me të dëgjuar lajmet nga mediet
elektronike, zë të gënjejë në mënyrën më skandaloze, se miratimi i saj ishte
meritë e tij, për çka kishte harxhuar shumë mjete financiare. Nis aksionin për
të mbledhë ndihma për t’i “kompensuar” shpenzimet e tij, shtyp e shpërndan
formularë që bashkatdhetarët të binden e ta kenë më lehtë për t’ia bartur
ndihmat nëpërmjet banke. Më pyesin bashkëveprimtarët e Lëvizjes nëse do të
duhej ta ndihmonin. Skandalizohem. Shkoj në Bruksel, mblidhet Kryesia e
Lëvizjes për Belgjikë, thërrasim Enver Hadrin të ishte i pranishëm.
“Përse gënjen kaq
paturpësisht, - i drejtohem Enver Hadrit në atë takim, - ti ke dëgjuar nga
mediet, si gjithë të tjerët, për miratim të rezolutës, përpara nuk ke ditur
gjë. Merita fillestare i takon një vajze të zellshme, veprimtare në Gjermani, e
cila ka gjetur lidhjet për të bindur një parlamentar gjerman të Parlamentit
Evropian, që i takonte fraksionit të partive ekologjike. Atë vajzë e njohin
shumica e shokëve të pranishëm. Atij parlamentari (emrin ia paskam harruar) i
është dorëzuar një tekst. Ka premtuar se do të angazhohet ta bindë fraksionin e
tij, pastaj fraksionet e tjera, duke shpjeguar se ai angazhim merr kohë të
gjatë. Kjo është ecuria e miratimit të Rezolutës. Në këtë pozitë kaq të mjerë
ke rënë, sa t’i mashtrosh bashkatdhetarët për të mbledhë ndihma që t’u dashkan
për të financuar aventura e degjenerimin tënd!? A nuk je i vetëdijshëm se mund
t’i nxisësh bandat e çetnikëve serbë në Bruksel ose doras të UDB-së, që të
vrasin, nëse do të dëgjojnë se ti ia ke imponuar PE të miratohet Rezoluta për
Kosovën. Këtu e tutje mos shpreso e kërko asnjë përkrahje e ndihmë nga
Lëvizja...!”
Ai mori pozë të zuzarit,
të kapur në flagrancë, filloi të bënë autokritikë e të kërkonte falje. E
përzumë nga takimi.
Disa javë më vonë, më 25
shkurt 1990, vritet.
Megjithatë, masivizimin e
pjesëmarrjes në varrimin e tij e organizoi Lëvizja, meqë donim ta shfrytëzonim
vrasjen e tij për ta akuzuar Beogradin si vrasës të kundërshtarëve politikë.
Në tubimin komomerativ që
u mbajt pas varrimit, sa mbaj mend në hotelin “Sheraton”, disa mjeranë që donin
të afirmoheshin si bashkëveprimtarë të “dëshmorit” Enver Hadri, folën gjepura
nga më të gënjeshtërta. Më lajmëruan mua të flisja në emër të Lëvizjes. Nuk e
kisha ndërmend. Gjithë të pranishmit po prisnin, unë nuk po ngitesha nga vendi.
Bashkëveprimtarët që i kisha ulur pranë m’u lutën të dilja. Dola, i thashë ca
llafe të përçarta, por besoj se audienca e kuptoj se nuk isha pjesëtar i atij
kori të gënjeshtarëve, që lavdëronin Enver Hadrin pa meritueshëm, përkundrazi.
Siç informova më herët, në
vitin 2003 kam bërë një bashkëbisedim të gjatë me njërin nga ish-shefat e
UDB-së, Shefqet Hashanin. Fare spontanisht më ka rrëfyer se pasi Kosova fitoi
autonominë kushtetuese në vitin 1974, përkatësisht u riorganizua edhe UDB-a në
KSA të Kosovës, duke dalë nga komandimi i deriatëhershëm i UDB-së republikane
të Serbisë. Me atë rast duhet të ketë pasur një konflikt, kush duhej t’ia
paguante rrogën Enver Hadrit. Udhëheqja e UDB-së së Kosovës ka kërkuar ndihmë
nga kryetari i Komitetit Krahinor të LKK-së, Mahmut Bakalli, i cili ia ka
arritur që atë pagë aty e tutje t’ia shkarkonte UDB-së federative. Këtë ma ka
konfirmuar edhe Mahmut Bakalli.
Sigurisht, kjo paraqitje
provokon e shokon, sepse turma e painformuar është mashtruar ta vlerësoj Enver
Hadrin për hero. Sidoqoftë, Enver Hadri ende ka shumë ithtarë që e madhërojnë,
ka përmendore, emra rrugësh e shkollash, prandaj nuk ia vlen të kemi
konfrontime në këtë kohë, të pakohë, siç shprehet populli.
Unë ndjej keqardhje për
atë viktimë mjerane, siç kam keqardhje për turma të injorantëve, që nga më pak
se hiçi, ose nga kundërkombëtarët sajojnë heronj.
Hafiz Gagica, prototip
tipik i organizimit “pacifist”
Hafiz Gagica është një nga
prototipat më tipik të organizimit “pacifist”, “demokratik”, “legal”, në
emigracion. Ai u emërua si kryetar i Degës së LDK-së nga Akademiku “Crni” më 6
maj 1990 dhe atë post e mbajti katër mandate, bile ishte edhe kryetar i kolegjit
të kryetarëve të të gjitha degëve të LDK-së në gjithë emigracionin shqiptar.
Për ata që nuk e dinë, akademiku “Crni” është prof. dr. Ali Aliu (që merr rrogë
nga tre akademi), i cili duhet të jetë rekrutuar përdhunshëm nga UDB-a për t’u
bërë dëshmitar në procesin gjyqësor kundër Adem Demaçit në vitin 1963 (shih
librin “Dosja Demaçi”, autor prof. dr. Hakif Bajrami).
E njihte “Crni” Hafiz
Gagicën përpara, apo ashtu e kishin urdhëruar!?
“Unë e themelova LDK-në”,
tha para ca ditëve Jusuf Buxhovi. Deri tani askush nuk e demantoi dhe nuk e
përmirësoi konstatimin e tij rrahagjoks. Meqë rezulton se JB ishte njeri i
UDB-së, atëherë duket i logjikshëm konstatimi se UDB-a e ka formuar LDK-në.
Dihet mirëfilli se pjesëtarët e shërbimeve sekrete nuk marrin vendime që bien
në kundërshtim me përcaktimet e shërbimit punëdhënës. Por, gjatë debateve që
pasuan, mbase u dëshmua se ai vërtet ishte pjesëtar profesional i atij
shërbimi, si me paraqitjet që bëri vetë, si me dëshminë e Hysen Gegës, por
akoma më flagrant është informimi i Shefqet Hashanit (ish-shef i UDB-së së
Kosovës dhe sekretar i parë i Ambasadës jugosllave në Gjermaninë P. gjatë
viteve 1978-1981), i cili pohon se Jusuf Buxhovi ka marrë pjesë aktive gjatë
procesit hetimor kundër tij në Beograd; Z. Hashani është dënuar në Beograd me
tetë vjet burgim në vitin 1981.
Cili është në të vërtetë
Hafiz Gagica, meqë ai pretendon se ishte i përndjekur politik i regjimit të
Beogradit (gjatë viteve 1980-1999)?
Në vitin 1979 ai erdhi në
Gjermani, te babai i vet. Meqë ai jetonte në Ludwigsburg, ku ishte i angazhuar
profesionalisht, si punëtor social, Bardhosh Gërvalla, u njohën mes tyre.
Bardhoshi ishte përkujdesur shumë për babën e Hafizit, meqë në ato vite
lëngonte nga sëmundja. Vetë babai i Hafizit e kishte lutur Bardhoshin të përkujdesej
për djalin e tij. Edhe vetë e kam dëgjuar atë të ankohej se e kishte lazdruar
djalin duke i dërguar para me tepri në vendlindje, prandaj nuk është interesuar
të mësonte fare në shkollë. Me para i është dashur t’i blinte notat që të mos
përsëriste klasën. Por të kota rezultuan përpjekjet e Bardhoshit dhe të Jusufit
që ta edukonin Hafizin në rrugë të mbarë, të arsimohej në Gjermani. Ai as pas
dhjetë vjetësh nuk u bë në gjendje të formulonte pa gabime një fjali të shkurt
në gjuhën gjermane.
Meqë u gjend në atë mes,
megjithatë asnjëherë nuk ishte konstruktiv, të paktën në sjellje dhe moralshëm.
Pas vrasjes së Jusufit, Kadriut e Badhoshit ai u bë pjesëtar i bandës
komplotistë, që komandohej nga Sabri Novosella. Në vitin 1985, kur Sabri
Novosella dhe banda e tij pushoi veprimtarinë e dukshme, edhe Hafiz Gagica u bë
i padukshëm. Tek më 6 maj 1990, kur Akademiku “Crni” e emëroi kryetar të Degës
së LDK-së në Gjermani, ai u faktorizua, për të qenë në krye të pengesës së
lëvizjes aktive patriotike e çlirimtare në emigracion.
Siç më ka (dez)informuar
shërbimi inteligjent “populli”, demonstratën e parë që e thirri Hafizi në
Stuttgart, për publikun shqiptar ishte në emër të LDK-së, zyrtarisht u bë në
emër të një grupimi të mbetur dogmatik gjerman, i cili përpara kishte qenë
pjesë e Partisë Komuniste të Gjermanisë Marksiste-Leniniste, sepse ai grup e
kishte paraqitur në polici kërkesën për ta marrë lejen.
Në kthesën e madhe të
organizimit “legal” pluralist (1990), edhe në emigracion shpërthyen entuziazmi
dhe zallamahia. Edhe mua më përfshinë, prandaj u angazhova t’i shtyp Programin
e Statutin dhe formularin për anëtarësim të LDK-së dhe i shpërndamë në
demonstratë që organizoi Lëvizja në mars të vitit 1990 në kryeqytetin e
Gjermanisë. Kështu doja që ata emigrantë, të cilët frikësoheshin të angazhohen
në Lëvizje nga përndjekjet serbe, të paktën të angazhohen në LDK.
Të gjitha subjektet e
organizuara në vitin 1991 vendosën të ndërmerrnin një aksion të ngutshëm, i
cili qe quajtur “ndihmë Kosovës me një armë” (e çmimi orientues i armës u
caktua 1 000 DM / 500 euro). Duhet të jenë mbledh shpejt e shpejt rreth 40
milionë DM. Ato u derdhën në xhirollogari e “fondit humanitar” në Aachen, të
cilin e “menaxhonin” Marjan Tuna dhe Hafiz Gagica. Pos atyre dyve, nuk di një
të 3-të që di se ku kanë përfunduar ato mjete (ndoshta di pjesërisht edhe Anton
Kola).
Pas atij aksioni u
themelua “Fondi i 3-përqindëshit”, të cilin e menaxhonte “qeveria në ekzil”.
Fillimisht u formua në marrëveshje me LPK-në, por meqë Bukoshi dhe stafi i tij rezultuan mashtrues, LPK u detyrua të tërhiqej nga marrëveshja. Edhe në xhirollogarinë e atij fondi kishte autorizim për të tërhequr mjete financiare Hafizi derisa, për arsyet që nuk i di, atë autorizim ia anuluan Bujar Bukoshi e Isa Mustafa.
Fillimisht u formua në marrëveshje me LPK-në, por meqë Bukoshi dhe stafi i tij rezultuan mashtrues, LPK u detyrua të tërhiqej nga marrëveshja. Edhe në xhirollogarinë e atij fondi kishte autorizim për të tërhequr mjete financiare Hafizi derisa, për arsyet që nuk i di, atë autorizim ia anuluan Bujar Bukoshi e Isa Mustafa.
I tepërt është informimi i
takimeve në Stuttgart të Hafiz Gagicës në krye me UDB-ashin Selim Broshaj,
sepse tashmë pothuajse të gjithë UDB-ashët ishin rreshtuar në LDK.
Ndoshta njëjtë, si dega në
Gjermani, vepruan edhe degët e tjera të LDK-së në shtete të tjera.
Të gjithë individët që u
përmendën këtu, në dukje të përndjekur nga regjimi neofashist serb, kanë
ithtarë, prandaj konfrontimet janë të dëmshme në këtë kohë.
“Qeveria Bukoshi në ekzil”, sabotuese e veprimtarisë patriotike e
çlirimtare në emigracion
Rëndom po zhurmohet shumë për t’i identifikuar UDB-ashët, oficerët,
bashkëpunëtorët, informatorët e ish-UDB-së famëkeqe, por sikur qëllimisht po
harrohet fakti se udhëheqësit kryesorë të UDB-së në Kosovë ishin funksionarët e
Lidhjes Komuniste të Kosovës, sidomos anëtarët e Komitetit Krahinor të LKK-së
dhe anëtarët e Këshillit Ekzekutiv (qeverisë). Ata funksionarë komunistë tashmë
e kishin primatin udhëheqës në LDK. Po në “qeverinë Bukoshi në ekzil” kishte
nga ata? Si nuk kishte!? Dihet mirëfilli se cilat funksione i kishin ushtruar
disa ministra të kësaj “qeverie” deri në dhjetor 1989. Për momentin po më
kujtohen emrat e Isa Mustafës dhe të Muhamet Bicaj. Po për Bujar Bukoshin,
vërtet, dinim gjë atëherë? Pak, fare pak. Ai u afirmua vetëtimthi me një aksion
spektakolar, i njohur si “kidnapim nga serbët me maska, duke i vënë thes në
kokë” (?). Në disa takime me Bujarin nuk ngurruam të bënim edhe biseda
“relaksuese”. Në njërën nga ato i pata bërë pyetje sugjestive: “Si nuk ke
treguar asnjë foto të torturave që duhet të kenë bërë kidnapuesit serbë!?” Ose:
“Si mund të arsyetohet që UDB-a ka rekrutuar spiunë zadrugarë (shitës) e mësues
edhe në shitoret e shkollat në fshatrat më të thella të Kosovës dhe nuk paskësh
qenë e interesuar të rekrutonte studentë shqiptarë që studionin në Beograd!?”
etj. Në vend të përgjigjes, ai ma ktheu: “Për shkak të kësaj goje të keqe që
ke, njerëzit të quajnë anarkistë, ekstremistë, armikë, prandaj të urrejnë e të
luftojnë”.
Ajo “qeveri” caktoi “tatim” në emigracion prej 3 % në paga e fitime. Ajo
“qeveri” mori në dorëzim mjetet financiare në aksionin gjithëpërfshirës “ta
ndihmojnë shkollën shqipe” (isha anëtar i këshillit koordinues).
Ajo “qeveri” mori në dorëzim mjetet voluminoze të aksionit “Gjithçka për
Drenicën” (mars-qershor 1998). Ajo “qeveri” nxori në shitje “bona” me vlerë
prej 500 e 1 000 DM, me premtim se paratë e atyre “bonave” do të kthehen pas
çlirimit të Kosovës. Etj.
Lëvizjes për rezistencë aktive dhe veprimtari çlirimtare, që përbëhej
nga patriotët idealistë, iu mbeti ta përballojnë veprimtarinë e tyre me forca
të veta. Masat e gjëra të emigrantëve ndihmat i derdhnin në fondin e Bukoshit e
të Isa Mustafës.
Ajo “qeveri” themeloi shërbim inteligjent, nëse mund t’u zihet besë
(dez)informimeve të Fadil Kajtazit, ndoshta për ta konkurruar shërbimin tjetër
që kishte formuar “presidenti” Rugova, siç (dez)informoi Mehmet Loci.
Ajo “qeveri” themeloi FARK-un, edhe pse platformë përcaktuese LDK-ja, e
cila kishte formuar “qeverinë”, kishte politikën “pacifiste” (por e themeloi që
t’ia kundërvinte UÇK-së; ia dolën vetëm pjesërisht, meqë në ndërkohë e futem
nën kontroll...).
Ajo “qeveri” simulonte qëndrimin më radikal, si alternativë për t’i
zvarrit shpresat e të zhgënjyerve nga “politika pacifiste” e Rugovës etj.
Edhe këta individë çmohen si të përndjekur, edhe pse LDK-ja ishte
“legalizuar” me regjistrimin e saj në Beograd, krerët e saj në Prishtinë i
ruante policia dhe i favorizonte regjimi i Millosheviqit.
E pra, gjithë këta individë kanë shumë ithtarë, prandaj konfrontimet
janë të dëmshme në këtë kohë.
Lëvizja dhe UÇK-ja nga cilat shërbime survejoheshin?
Kush duhet të ketë survejuar Lëvizjen (LPK) dhe UÇK-në gjatë viteve
1990-1999, respektivisht 1993-1999 dhe veprimtarët e tjerë patriotë e
çlirimtarë, kur e gjithë struktura shqipfolëse e UDB-së ishte përfshirë në
LDK!? Spiunë serbë nuk depërtonin dot në radhë tona, meqë i pengonte mosnjohja
e gjuhës shqipe. Mund të thuhet, ato dy shërbime të sipërpërmendura na
survejonin. Dhe kujt ia dorëzonin rezultatet, pos që bënin luftë speciale,
intensivisht e më përkushtim, të paskrupullt, kundër LPK-së dhe UÇK-së!?
Kosova e çliruar dhe rikthimi në pushtet i ish-nomenklaturës komuniste
nëpërmjet UNMIK-ut
Fatmirësisht ndodhi çlirimi i Kosovës nga pushtimi serb por,
fatkeqësisht, iu imponua protektorati ndërkombëtar nga Këshilli i Sigurimit të
OKB-së. Enkas u formua UNMIK-u (Misioni i KN për Kosovën). Askush nuk është
interesuar të bëjë studim, cilët njerëz e udhëhiqnin UNMIK-un. Nga informimet e
përcipta që kam, sidomos në udhëheqje të tij operative, ishin pozicionuar
ish-miq të Jugosllavisë (që kishin shërbyer si ambasadorë dhe personel
diplomatik në Beograd). Ke përzgjodhën nga shqiptarët vendorë që të angazhoheshin
në strukturat policore, prokuroriale, gjyqësore, administrative? Mbase asnjërin
nga ish-të përndjekur politikë. Listat e ish-kuislingëve ua servonte Beogradi
dhe kryesisht ata punësoheshin në kreun e policisë, në prokurori, në gjyqësi,
në administratë. Kë angazhuan si përkthyes? Kryesisht ish-pjesëtarë të
nomenklaturës ose fëmijët e tyre, meqë ata kishin qenë të privilegjuar ta
mësonin anglishten, kurse të përndjekurit dhe fëmijët e tyre nuk i kanë pasur
mundësitë ta mësojnë, edhe po ta dinin, nuk i angazhonin. Prandaj, si asnjëherë
dhe në asnjë vend të botës, doli e fituar në zgjedhjet e para pas lufte
ish-nomenklatura komuniste, e organizuar në LDK, e jo ata që e kishin bërë
luftën, që e kishin mbajtur mbi supet e tyre pasojat kryesore të saj. Sigurisht,
doli e fituar edhe për shkak të keqsjelljeve, abuzimeve e krimeve të disa
pjesëtarëve që ishin pjesëtarë të UÇK-së.
Demokracia është e zorshme
Edhe Aristoteli, para rreth 2300 vjetëve, duke analizuar e krahasuar mbi
160 kushtetuta të ish-qyteteve-shtete “greke”, ka shkruar se sa e zorshme është
demokracia, fillimisht për ta përzgjedhur variantin më të mirë të saj, akoma më
e zorshme për t’u praktikuar.
Do të mjaftonte argumentimi vetëm nëpërmjet një fakti, për të provuar se
vërtet është e zorshme demokracia, nëse kemi parasysh rezultatin e zgjedhjeve
të fundit: rritë numrin e votave partia që komandohet nga ish-funksionari
komunist Isa Mustafa, i favorizuar si ministër-kuisling edhe nga regjimi
neofashist i Millosheviqit.
Ky argument dëshmon pse Kuvendi i Kosovës nuk mund të miratojë ligj për
lustracionin (siç po quhet, për të pamundësuar të konkurrojnë për t’u zgjedhur
parlamentarë ish-pjesëtarët e nomenklaturës moniste). Praktika dhe përvoja e
shteteve të tjera ka dëshmuar se nëpërmjet ligjit përkatës nuk po mund t’u
pamundësohet konkurrimi i atyre pjesëtarëve të nomenklaturave moniste,
sunduese.
Rasatet e individëve, që me pa dëshirë i evidentova (në libra e kam bërë
më gjerësisht), mbase dëshmojnë mjaftueshëm se nuk duhet të kemi konfrontime mes
ish të përndjekurve dhe përndjekësve të tyre (pjesëtarë të nomenklaturës
komuniste, përfshirë këtu edhe strukturat e UDB-së, policisë, prokurorisë,
gjyqësisë), meqë populli është i dyzuar. Insistimi i sforcuar i të përndjekurve
për t’i dënuar ato struktura dhe për t’ua pamundësuar atyre rikthimin në
pushtet, përçanë e konfronton shoqërinë tonë. Kosovës së brishtë nuk i duhen
përçarjet e konfrontimet, sepse sfilitin energjitë e shoqërisë sonë për
shtetndërtim e konsolidim të shtetit tonë.
Insistimi për t’i hapur dosjet është sqarues dhe produktiv? E para,
cilat dosje, kush i ka bërë ato dhe kush i ka? E dyta, sa dhjetëra mijë dosje
duhet të ketë (kur supozohet se strukturat e UDB-së duhet të kenë pasur rreth
80 mijë pjesëtarë). E treta, thuhet se të gjitha dosjet e shërbimeve janë në
Beograd, atëherë do t’i dorëzojë regjimi serb në origjinal, të paprekura (apo
ndoshta do të na dorëzohen kopje “dosjesh”, si në rastin e Ali Ahmetit me
bashkëveprimtarë, kur u fabrikuan “dosje” nga Bozhidar Spasiqi, ish-shef federativ
dhe Isen Musliut, ish-shefi i UDB-së për gjithë Pollogun, me porosi e pagesë të
Menduh Thaqit)!? E katërta, çfarë traumash e konfliktesh do të shkaktoheshin
kur ndonjë shok e bashkëveprimtar i deridjeshëm do të dekonspirohet si spiun,
qoftë me “dosje” të falsifikuar, ose me dosje të saktë (siç më hidhërohen dhe
armiqësohen me mua, kur diskreditoj “patriotët” për UDB-ash)!?
Këso pyetjesh për fantazmën “dosjet” mund të bëhen përplot, por ia vlen
të harxhojmë kohë e energji për to, kur ato gjithsesi do të jenë vetëm
kundërproduktive, irrituese, armiqësuese!? Në Kosovë dihen kush ishin UDB-ashët
legalë, sepse atyre u paguhej rrogë e rregullt nga buxheti i KSA të Kosovës.
Përse qenkan interesant spiunët, që u kanë ofruar atyre (dez)informata, e të cilat ata UDB-ash i kanë operacionalizuar, duke udhëhequr hetimet fillestare, kundër të përndjekurve politikë, të shoqëruar me tortura barbare, antiligjore? Plaku i urtë do të thoshte, duke ditë ku është ujku, nuk ka nevojë të kërkohen gjurmët që të dërgojnë tek ai.
Përse qenkan interesant spiunët, që u kanë ofruar atyre (dez)informata, e të cilat ata UDB-ash i kanë operacionalizuar, duke udhëhequr hetimet fillestare, kundër të përndjekurve politikë, të shoqëruar me tortura barbare, antiligjore? Plaku i urtë do të thoshte, duke ditë ku është ujku, nuk ka nevojë të kërkohen gjurmët që të dërgojnë tek ai.
Gjithashtu, të pamoralshme janë kritikat e ish të përndjekurve dhe
luftëtarëve të lirisë kundër angazhimit të ish-UDB-ashëve dhe pjellës së tyre
në strukturat shtetërore, kur i votojnë e rivotojnë të njëjtit qeveritarë, të
cilët ua mundësojnë atyre punësimin në strukturat e shtetit, bile edhe i
privilegjojnë.
Në përmbyllje them se shoqëria jonë duhet të përcaktohet për catarsis,
pajtim, paqe sociale, ose të paktën për “armëpushim”, duke u orientuar që vetëm
nëpërmjet votimit të ndodhë seleksionimi, pse jo edhe ndëshkimi i
ish-pjesëtarëve të nomenklaturës komuniste, rrjedhimisht edhe ish-UDB-shëve.
Votuesit kanë të drejtë t’i kushtëzojnë të votuarit e tyre që ta bëjnë seleksionimin, t’i mbajnë në punë vetëm ish-profesionalistët që zbatojnë ligjet. Kurse kundër ish-UDB-ashëve, që kanë ushtruar dhunë fizike ndaj të përndjekurve politikë, në kundërshtim me ligjet e kohës, duhet të bëhen vetëm denoncime individuale, nëse individualisht nuk jemi në gjendje t’i falim.
Votuesit kanë të drejtë t’i kushtëzojnë të votuarit e tyre që ta bëjnë seleksionimin, t’i mbajnë në punë vetëm ish-profesionalistët që zbatojnë ligjet. Kurse kundër ish-UDB-ashëve, që kanë ushtruar dhunë fizike ndaj të përndjekurve politikë, në kundërshtim me ligjet e kohës, duhet të bëhen vetëm denoncime individuale, nëse individualisht nuk jemi në gjendje t’i falim.
Besoj, kam ofruar informata e (ç)velësime edhe për individë, të cilët,
për mendimin tim, u kanë shërbyer shërbimeve të Beogradit e të Prishtinës, por
që vazhdojnë të vlerësohen si çlirimtarë e heronj. Edhe të tillët ende kanë
shumë ithtarë të tyre, kurse kryeshefat e atyre strukturave të atëhershme në
Kosovë (edhe të UDB-së) si, ta zëmë, Fadil Hoxha (që tashmë komuna e Gjakovës
do t’i ngritë përmendore), Mahmut Bakalli, Azem Vllasi, Isa Musatafa etj.,
gjithashtu kanë shumë ithtarë.
Megjithatë, meqë radhita ca emra, do të duhej të bëhej vlerësim i diferencuar, për funksionarë titistë të viteve të ’70-ta, të cilët kontribuuan në zhvillim të hovshëm të Kosovës dhe në funksionarë kuislingë të Beogradit neofashist gjatë viteve 1981-1998. Nga këta të fundit do t’i veçoja Azem Vllasin e Isa Mustafë si më tipikë, por numri i votuesve të Isa Mustafës dëshmon tepër qartë se sa e dyzuar është shoqëria jonë, çfarë vetëdije të sfilitur kombëtare e politike kemi.
Megjithatë, meqë radhita ca emra, do të duhej të bëhej vlerësim i diferencuar, për funksionarë titistë të viteve të ’70-ta, të cilët kontribuuan në zhvillim të hovshëm të Kosovës dhe në funksionarë kuislingë të Beogradit neofashist gjatë viteve 1981-1998. Nga këta të fundit do t’i veçoja Azem Vllasin e Isa Mustafë si më tipikë, por numri i votuesve të Isa Mustafës dëshmon tepër qartë se sa e dyzuar është shoqëria jonë, çfarë vetëdije të sfilitur kombëtare e politike kemi.
Hakmarrja më e vyer e më e çmuar kundër ish-nomenklaturës komuniste,
kundër ish-UDB-ashëve, kundër ish-kuislingëve të regjimit të Millosheviqit
etj., ka ndodhur me Çlirimin e Kosovës nga pushtimi serb dhe nga
bashkësundimtarët e tyre. Meqë kjo është e vërtetë, jam i mendimit se nuk na
duhet hakmarrja e revanshizmit kundër mbetjeve të atij sistemi, prandaj apeloj
të mos ndodhin, për hir të përparimit të shoqërisë e shtetit tonë.
Uroj të mos keqkuptohem, por jam i bindur, më të dëmshëm se
ish-UDB-ashët dhe ish-funksionarët kuislingë, janë gjithsesi ata që po e
vjedhin tani shtetin tonë. Kundër këtyre të fundit duhet të mobilizohen të
gjithë qytetarët, sidomos ish-veprimtarët çlirimtarë.
Në fund të fundit, populli
ynë ka mbijetuar robëri mbi dy mijëvjeçare, fatkeqësisht gjithnjë duke u
tkurrur, përse atëherë të mos mund ta durojë këtë fazë të tranzicionit, e cila
është shpejt kalimtare, meqë edhe ligji biologjik do ta bëjë “seleksionimin”,
më shpejt sesa dëshirojmë, duke na vdekur, si ish-pjesëtarët e nomenklaturës,
por ashtu edhe ne ish të përndjekurve. Gjeneratat pasuese pastaj, po deshën, le
të merren me analiza, kush çfarë ishte dhe çfarë (s)ka bërë, t’i seleksionojnë,
uroj drejtësisht, bazuar në sistemin e vlerave që dalin nga arsyeja racionale.
kush i ka menagjue dhe si paret e "vendlindja therret", s keni informata ?
AntwortenLöschen